Balqash qalasynda zeınetker azamat óziniń qyzynan aı saıyn 10 AEK mólsherinde alıment óndirýdi surap, sotqa talap-aryz bergen, dep habarlaıdy Egemen.kz.
Talap qoıýshy óz ótinishinde kúndelikti turmystyq qajettilikteri men dári-dármekke turaqty shyǵyndary bar ekenin alǵa tartyp, qyzynyń tarapynan materıaldyq qoldaý kórsetilmeıtinin kórsetken.
Alaıda sot isti qaraý barysynda «Neke (erli-zaıyptylyq) jáne otbasy týraly» kodekstiń 145-babynyń talaptaryna sáıkes, kámeletke tolǵan balalar tek eńbekke jaramsyz ári naqty kómekke muqtaj ata-analaryn ǵana asyraýǵa mindetti ekenin nazarǵa alǵan.
Tarazda 11-synyp oqýshysy ákesinen alıment óndirip aldy
Is materıaldaryna sáıkes, talap qoıýshynyń aı saıyn 128 229 teńge kóleminde zeınetaqy alatyny, sondaı-aq onyń jyljymaıtyn múlki men jeke avtokóligi bar ekeni anyqtalǵan. Sonymen qatar onyń em-domǵa turaqty ári dáleldengen úlken shyǵyndary týraly qujattar sotqa usynylmaǵan.
Jaýapker retinde tartylǵan qyzy óz kezeginde eki balany jalǵyz tárbıelep otyrǵanyn, tabysynyń tómen ekenin aıyna 85 myń teńge jalaqy alatynyn jáne otbasylyq júktemesi joǵary ekenin aıtyp, talappen kelispegen.
Sot sondaı-aq talap qoıýshynyń materıaldyq jaǵdaıy ómirlik qajettilikterin óteýge jetkilikti ekenin, al qosymsha kómekke muqtaj ekendigi naqty dáleldenbegenin atap ótti. Budan bólek, taraptar arasyndaǵy burynnan qalyptasqan kelispeýshilikter de daýdyń ýshyǵýyna áser etkeni kórsetilgen.
Batys Qazaqstan oblysynda alıment tólemegen boryshker bas bostandyǵynan aıyryldy
Barlyq mán-jaıdy eskere otyryp, sot talap qoıýshyny zańnamada kórsetilgen «kómekke muqtaj» sanatyna jatqyzýǵa negiz joq degen qorytyndyǵa kelip, talapty qanaǵattandyrýdan bas tartty.
Sot sheshimi zańdy kúshine endi.
Eske sala keteıik, Májilis notarıat salasyna baǵyttalǵan zań jobasyna ózgertýler engizdi. Zańǵa engizilgen túzetýlerge sáıkes, azamattarǵa alıment qarajatyn qabyldaý úshin bankte arnaıy bólek shot ashý múmkindigi beriledi.
Janbota BAHYTBEK,
EUÝ stýdenti