Elimizdegi bas basylymdar «Egemen Qazaqstan», «Kazahstanskaıa pravda» gazetteri 105 jyldan beri oqyrman qolyna jetip keledi, dep jazady Egemen.kz.
2024 jyldyń jeltoqsan aıynda el gazeti «Egemen Qazaqstan» mereıli datany «Egemenniń eldik joly» forýmy aıasynda atap ótti.
Al búgin «Kazahstanskaıa pravda» «Úlken joldyń kezeńderi» ǵylymı-tájirıbelik konferensııasynda basylym tarıhyna toqtaldy.
Ǵasyrdan asa jańalyqtyń jarshysy bolyp kele jatqan qos basylymdy Memlekettik keńesshi Erlan Qarın quttyqtady.
Memlekettik keńesshi ult baspasóziniń ustyny sanalatyn basylymdardyń qazaq jýrnalıstıkasynyń temirqazyǵyna aınalǵanyn atap ótti.
«Búginde irgeli ujymdar halyq múddesine, el ıgiligine qyzmet etýdiń ozyq úlgisin kórsetip otyr. Memlekettik saıasattyń mán-mańyzyn túsindirýge belsene atsalysyp, tyń bastamalar men jańa reformalardy júzege asyrýǵa úles qosyp keledi», degen Erlan Qarın basylym qyzmetkerleriniń aldaǵy ýaqytta da elimizdiń órkendeý jolynda qajyrly eńbek ete beretinine senim bildirdi.