Eki nysan paıdalanýǵa berildi

Jańa nysannyń ashylýymen aýyl turǵyndaryn quttyqtaǵan oblys ákimi Nurlybek Nálibaev jyl saıyn aımaq­taǵy densaýlyq saqtaý salasynyń bıýdjeti ulǵaıyp kele jatqanyn aıtyp ótti.

«Memleket basshysy bastamashy bolǵan ulttyq joba halyqtyń ómir súrý uzaqtyǵy men áleýmettik ál-aýqatyn arttyrýǵa múmkindik berip otyr. Joba aıasynda oblys kóleminde 28 medısınalyq nysan salyndy. Osy aýdandaǵy Eset batyr, Myrzabaı ahýn aýyldarynda eki dárigerlik ambýla­torııa 2023 jyly ashylyp, qazir el ıgiligine qyzmet etip keledi. Búgin qoldanysqa berilip otyrǵan nysan da bastapqy medısınalyq kómek kórsetý sapasyn jaqsarta túserine senemiz. Dárigerlerimiz elge adal qyzmet etip, turǵyndardyń alǵysyna bólene bersin», – dedi oblys basshysy.

О́tken jyly óńirde 8 medısınalyq nysanǵa kúrdeli jóndeý jumystary júrgizildi. Bıyl alty nysannyń jylý júıesi gazǵa aýystyrylady. Sońǵy 2 jylda oblystyń eldi mekenderindegi densaýlyq saqtaý mekemelerine 245 jańa sanıtarlyq avtokólik tabystaldy, onyń 11-i Jalaǵash aýdanynyń úlesine tıdi.

Byltyr naýryzda Syrda «Rýhanııat jyly» bastalyp, onyń aıasynda mádenı-kópshilik sharalarmen qatar aýqymdy jobalar da qolǵa alyndy. Aımaq mádenıeti men ónerine ózgeshe lep ákelgen jyl aıasynda kóp­fýnksıonaldy, 1000 oryndyq «О́ner ortalyǵy» salynyp, sımfonııa orkestri, ınklıýzıvti teatr, jastar teatry, zamanaýı bı, hor ujymdary jasaqtaldy. Dástúrli ónerdiń baıraǵy kóterilgen óńirde «Jyraýlar úıi» ashylyp, jádiger jyrdy ardaq tutqan aǵaıyn qýanyshqa keneldi.

Ataýly jyl aıasynda barlyq aýdanda rýhanı-mádenı ortalyqtar qurylysy bastalyp, aldy qazir qoldanysqa berile bastady. Neke qııý zaly, kitaphana, mýzeı, arhıv, jastar saraıy, ardagerler men analar úıi bar osyndaı nysannyń biri Jalaǵash kentinde esigin aıqara ashty. Úsh dúrkin «Altyn dombyra» ıegeri Muhtar Nııazovtyń arnaýymen bastalǵan saltanatta oblys basshysy turǵyndardy quttyqtap, ortaq iske úles qosqan azamattardy marapattady.

Qyzylorda oblysy,

Jalaǵash aýdany