Oral qalasyndaǵy №47 Qadyr Myrza Áli atyndaǵy orta mektep oqýshylary ormanshylarmen birigip, boz arsha jáne arsha tuqymdy butalardy tuqymynan ósirýge kiristi.
Respýblıkalyq «Taza Qazaqstan» ekologııalyq aksııasy aıasynda qolǵa alynǵan bul bastamaǵa Oral orman jáne janýarlar dúnıesin qorǵaý mekemesiniń qyzmetkerleri jetekshilik jasaıdy. Qańtar aıynyń sońynda arnaıy ydystarǵa egilgen tıtimdeı dánniń tamyr tartyp, ósip ketýin Qadyr mektebiniń oqýshylary kún saıyn qadaǵalap keledi. Olar bıologııa sabaǵynda arsha tuqymdaryn konteınerge óz qoldarymen ekken edi. Oqýshylardyń árqaısysyna bekitilgen ydys, quraldary bar. Al Oral orman jáne janýarlar dúnıesin qorǵaý mekemesi basshysynyń kómekshisi Temirlan Temirǵalıev óskinderdi kútip-baptaýdyń qyr-syryn jas baǵbandarǵa jalyqpaı úıretedi.
Egilgen arsha dánekteri oıdaǵydaı ósip ketse, kóktemde mekteptiń aýlasyna «qonys aýdarady». Osylaısha, mekteptiń aınalasy jaıqala túspek.
Batys Qazaqstan oblysynda «Taza Qazaqstan» ekologııalyq aksııasy «Jasyl aımaq», «Taza ólke», «Kıeli meken», «О́negeli urpaq» jáne «Móldir bulaq» atty 5 kezeń boıynsha júrip jatyr. Ekologııalyq aksııalarǵa eriktiler, stýdentter, belsendi jastar, qala turǵyndary, jalpy sany 7,5 myńnan asa adam qatysypty. Al «Biz taza el úshin» atty qoqys jınaý estafetasy kezinde 200-ge jýyq adam 6 komandaǵa bólinip, qalany 3 tonna qoqystan tazalap shyqqan.
Batys Qazaqstan oblysy