Memleket basshysy Halyqaralyq kúres federasııasynyń prezıdenti Nenad Lalovıchti qabyldady, dep jazady Egemen.kz.
Qasym-Jomart Toqaev kúrestiń halyqaralyq sport arenasyndaǵy elimizdiń bedelin nyǵaıtýda aıtarlyqtaı rólge ıe ekenin aıtty. Sonymen qatar álemdik týrnırlerde tabysty óner kórsetip júrgen otandyq balýandardyń jetistikterin joǵary baǵalady.
Memleket basshysy Qazaqstannyń Halyqaralyq kúres federasııasymen strategııalyq yntymaqtastyqty odan ári arttyrýǵa nıetti ekenin málimdedi. Qasym-Jomart Toqaevtyń aıtýynsha, ınfraqurylymdy jetildirý, daıarlyqtyń ozyq ádisterin engizý jáne elimizde halyqaralyq týrnırlerdi ótkizý osy sport túriniń tanymaldylyǵy men básekege qabilettiligin eseleýge yqpal etedi.
Nenad Lalovıch qonaqjaılyq tanytqany úshin Qasym-Jomart Toqaevqa rızashylyǵyn bildirip, yqpaldastyqty jalǵastyrýǵa daıyn ekenin jetkizdi. Ol Qazaqstandy federasııanyń mańyzdy seriktesi dep atap ótip, bizdiń ulttyq kúres mektebiniń zor tabystaryna toqtaldy. Nenad Lalovıchtiń aıtýynsha, qazaqstandyqtardyń deni saý ult qalyptastyrýǵa umtylysy sport pen basqa da salalarda joǵary nátıjege qol jetkizýge septigin tıgizedi.
Kezdesýde Qazaqstannyń álemdik sport qoǵamdastyǵyndaǵy bedelin nyǵaıtý jáne basymdyqqa ıe sport túri retinde kúresti odan ári ilgeriletý perspektıvasy talqylandy.
Kezdesý sońynda Memleket basshysy Qazaqstandaǵy kúresti damytýǵa qosqan úlesi úshin Halyqaralyq kúres federasııasynyń prezıdentin II dárejeli «Dostyq» ordenimen marapattady.