Abaı oblysynyń polıseıleri jedel izdestirý sharasy aıasynda esirtki zattaryn zańsyz saqtaý faktisin anyqtady, dep habarlaıdy Egemen.kz.
Polısııa basqarmasy usynǵan derekke sáıkes, Kanonerka aýylynyń turǵyny úlken kólemdegi esirtkini saqtap kelgen.
Shuǵyl tintý kezinde 46 jastaǵy er adamnyń kúrtesiniń ishki qaltasynan erekshe ıisi bar, qoıý jasyl tústi ósimdik tektes zat salynǵan qaǵaz orama tabyldy. Syrtqy qaltasynan da soǵan uqsas zattyń shashyrańqy túri anyqtaldy.
Sonymen qatar, turǵyn úı aýmaǵyn tintý barysynda sharýashylyq qurylysynan taǵy bir qaǵaz orama tabyldy, onyń ishinde de qoıý jasyl tústi ósimdik tektes zat bolǵan. Basqa bir qurylystan da ósimdik tektes zattyń shashyrańqy túri anyqtaldy. Úıdegi eden astyndaǵy jertóleden kólemi 0,5 lıtr bolatyn eki shyny bankadan da esirtki tabylǵan.
Saraptama qorytyndysyna sáıkes, tárkilengen zattyń jalpy salmaǵy 890,05 gramm qurǵaq marıhýana ekeni anyqtaldy. Atalǵan fakti boıynsha kúdiktige qatysty sotqa deıingi tergeý bastaldy.