Memleket basshysy bastamashy bolǵan «Jaıly mektep» ulttyq jobasy aıasynda Qyzylorda oblysynda 21 mektep boı kóteredi. Ulttyq joba sheńberinde salynǵan 2700 oryndyq 5 mektep paıdalanýǵa berildi. Kelesi oqý jylyna deıin taǵy beseýi esigin aıqara ashady. Bilim berýmen qatar oqýshylardyń jan-jaqty damýyna bar jaǵdaı jasalǵan osyndaı bilim oshaqtarynyń ekeýi oblys ortalyǵynan oryn tepken.
BAQ ókilderine arnalǵan baspasóz týry aıasynda oblys ortalyǵyndaǵy osy mektepter jaıymen tanystyq. Qalanyń sol jaǵalaý bóliginde 900 balaǵa arnalyp ashylǵan №290 orta mektepte qazir 1000-nan asa oqýshy bilim alyp júr.
Balalardyń qaýipsizdigi úshin beınekameramen jabdyqtalyp, týrnıket qoıylǵan mektepte bastaýysh, orta jáne joǵary synyp oqýshylary úsh blokta bilim alady. Fızıka, hımııa, bıologııa, robottehnıka kabınetteri balany erte bastan ǵylymǵa baýlý úshin sońǵy úlgidegi zamanaýı qurylǵylarmen jabdyqtalypty. Olardyń mektepte júrip-aq, belgili bir kásip túrin meńgerýine tigin, dızaın, tehnologııa kabınetterindegi qural-jabdyqtar da úlken septigin tıgizedi.
«Jaıly mekteptiń negizgi maqsaty sapaly bilim men ónegeli tárbıe berý arqyly izgiliktiń ordasyna aınalý desek qatelese qoımaspyz. Balalardyń mektepke qýanyp kirgenin kórýdiń ózi bir baqyt qoı. Biz shákirtterimizdi ǵylymǵa baýlýmen qatar, olardyń kásibı baǵdar alýyna da mán beremiz. Tańerteń oqyp, tústen keıin túrli úıirmelerden qalmaıtyn oqýshylarymyzdyń talaby qýantady. 3D modeldeý, «AutoCAD» baǵytyndaǵy jobalar jasap júrgen balalarymyz da bar», deıdi mektep dırektory Móldir Smahanova.
Ár qabattaǵy kovorkıng alańdary balalardyń shyǵarmashylyqpen aınalysyp, aqyl-oıyn ushtaýdyń úlken múmkindigi. Biz barǵanda olardyń biri bestas oınap, keıbiri sýret salyp jatty. Osy alańdarda ulttyq oıyndar men túrli baıqaýlar uıymdastyrylady.
Inklıýzıvti bilim alatyn shákirtter úshin de bar jaǵdaı jasalǵan. Ár bloktyń sport zaldaryndaǵy qurylǵylardy jyljytyp qoıýǵa bolady.
«Beıneleý óneri» bólmesindegi balalar jasaǵan músin kózdiń jaýyn alady. Dáýren Júsipbaev jetekshilik etetin úıirme oqýshylary ulttyq naqyshtaǵy shahmat tastaryn ázirlep jatyr eken. Osynda ótetin grafıka jáne jobalaý sabaǵynda oqýshylar 3D modeldeýge beıimdeledi. Jýyrda oqýshylar ózderi jobalap, osyndaǵy qurylǵylar kómegimen jasaǵan buıymdaryn jármeńkege qoıyp, odan túsken qarjyny jaǵdaıy tómen otbasylar qajetine jumsapty.
«Tamaqtaný mádenıeti» kabıneti oqýshy qyzdardyń keleshegine jaraıtyn tálim beredi. Osynda mekteptegi «Ájeler mektebiniń» músheleri shákirtterdi ulttyq taǵamdardy daıyndaýǵa baýlyp júr.
Jyl basynda ulttyq joba aıasynda KBI shaǵyn aýdanynan taǵy bir mektep paıdalanýǵa berildi. Qazir 600 oqýshyǵa arnalǵan bilim oshaǵynda 1051 bala bilim alyp jatyr. Burynǵy №197 mekteptiń ornyna jańa nysan boı kótergende, osy aýdan turǵyndarynyń qýanyshynda shek bolǵan joq.
«Jańa ǵımarat oqýshylarmen qatar ustazdarǵa da tájirıbesin baıytatyn is-sharalar ótkizip, bilimi men biligin tolyq tanytýǵa múmkindik berip otyr. Osynda kóship kelgeli 138 oryndyq májilis zalynda shákirtterimiz de bilim men tárbıege qatysty túrli keshter uıymdastyryp, erekshe qulshynyp júr. Olar endi burynǵydaı úıirme izdep, alysqa sabylmaıdy. Mekteptegi sport, qolóner, sýret, dombyra, bı úıirmeleriniń birine barady. Kitaphana qory da baı. Hımııa, fızıka, bıologııa kabınetteri joǵary deńgeıde jabdyqtalǵan. Múmkindigi shekteýli balalarmen bólek bloktaǵy kabınetterde defektolog, logoped, psıholog, áleýmettik-pedagog mamandar jumys isteıdi», dedi mektep dırektory Erkin Aqshalov.
Qyzylorda