Qorqyt ata atyndaǵy Qyzylorda ýnıversıtetinde 1-kýrs stýdentteriniń «Femıda – 2025» kásibı saıysy ótti. «Quqyqtaný» jáne «Ákimshilik ádilet» bilim baǵdarlamalary boıynsha bes komanda arasynda ótken saıys elimizde zań men tártip ıdeologııasyn tereńdetý baǵytyna arnalyp otyr.
Bes kezeńnen turatyn saıysqa oblystyq sottyń ákimshilik ister jónindegi sot alqasynyń tóraǵasy Janat Ospanova, Sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti basshysynyń birinshi orynbasary Aıdos Júnisov, Qorqyt ata atyndaǵy Qyzylorda ýnıversıteti sybaılas jemqorlyqqa qarsy komplaens-ofıseri Álibek Jappasbaev qazylyq etti.
«Sálem – sózdiń anasy» dep atalatyn alǵashqy bólimnen-aq stýdentterdiń saıysqa tyńǵylyqty daıyndalǵany baıqaldy. Keıbir top ózderin ánmen tanystyrsa, taǵy biri qoǵamdaǵy keleńsizsizdikti kórsetetin shaǵyn qoıylym qoıdy. Komandalar óneri 5 baldyq júıe boıynsha baǵalandy.
Qoǵamda zań men tártip ıdeologııasyn tereń ornyqtyrý maqsatynda uıymdastyrylǵan saıysqa qazylyq etkender jastardyń jan-jaqty ázirlengenin aıtady. «Stýdentterdiń oı-órisin keńeıtip, sala mamanyna qajetti qasıetterge baýlýdy kózdeıtin saıysta jastar bilimderiniń tereńdigin, shyǵarmashylyq izdenisterin kórsetti. Osyndaı kreatıvti jastardan bilikti maman shyǵaryna senim mol», deıdi oblystyq sottyń ákimshilik ister jónindegi sot alqasynyń tóraǵasy Janat Ospanova.
Al ýnıversıtettegi sybaılas jemqorlyqqa qarsy komplaens-ofıseri Álibek Jappasbaev búgingi is-sharada birinshi kýrs stýdentteri zań men tártip ádilettiliktiń basty sharty ekenin kórsete alǵanyn atap ótti.
Saıys qorytyndysy boıynsha «Iý-24-7» toby I oryn ıelense, odan keıingi oryndardy «Iý-24-1» jáne «Iý-24-9» komandalary aldy. Al saıystyń bas júldesi «Iý-24-3» tobyna buıyrdy.
Úzdik komandalarǵa arnaıy dıplomdar men alǵys hattar tabystaldy.
Qyzylorda