Kórnekti memleket jáne qoǵam qaıratkeri Jumabek Táshenovtiń 110 jyldyǵyna oraı Shymkentte respýblıkalyq ǵylymı-tájirıbelik konferensııa ótti. Oǵan zııaly qaýym ókilderi, joǵary oqý oryndarynyń basshylary men stýdentter qatysty. Ony J.Táshenov atyndaǵy ýnıversıtet uıymdastyrdy.
Jıyndy osy joǵary oqý ornynyń basqarma tóraǵasy, akademık Ońalbaı Aıashev júrgizdi. Ǵylymı basqosýdyń alǵashqy bóliminde J.Táshenovtiń ómir tarıhy, azamattyq ustanymy men qazaq jeriniń tutastyǵyn saqtap qalýdaǵy erligi týraly derekti fılm kórsetildi.
Odan keıin sóz alǵan ekonomıka ǵylymdarynyń doktory Rahman Alshanov KSRO kósemi N.Hrýshevtiń Qazaqstannyń soltústik oblystaryn Reseıge berý jónindegi ıdeıasyna qasqaıa qarsy turǵan Táshenovtiń batyrlyǵy búgingi jastarǵa úlgi-ónege ekenin jetkizdi.
«Jumabek Ahmetuly eldiń taǵdyryn mansabynan bıik qoıyp, qazaq jeriniń bútindigin saqtap qaldy. Sonymen birge Mańǵystaýdy Túrikmenstanǵa qosý týraly másele kóterilgende de birinshi bolyp qarsylyq tanytty. Osyndaı birtýar azamattyń ójettigi men qaısarlyǵy eshqashan umyt qalmaýǵa tıis», dedi ol.
Sondaı-aq belgili qaıratker Zaýytbek Turysbekov Baýyrjan Momyshuly maıdan batyry bolsa, Jumabek Táshenov beıbit kúnniń qaharmany deı kelip, Reseıde elshi qyzmetinde júrgende sol eldiń memlekettik arhıvinde Turar Rysqulov, Álimhan Ermekov, Nurtas Ońdasynov, Jumabek Táshenovke qatysty tyń derekter jınap, sonyń negizinde derekti fılm túsirilgenin aıtty.
«Osyndaı qundy dúnıeler arqyly mektep oqýshylarynyń boıyna otansúıgishtik rýhtaǵy tárbıeni sińirýge bolady. О́z basym Jumabek Táshenovtiń ultjandylyǵyn erekshe kóremin. Birde Jumekeń Úkimet basshysy bolyp júrgende Túrkistan óńirine qarasty Baltakól aýylyna jumys saparymen barǵanda sovhoz jylqysynyń qamalyp turǵanyn kóredi. Onyń sebebin surasa jergilikti basshylar Máskeýden «jylqyny etke ótkizińder» degen tapsyrma túskenin aıtady. Sony estigen Jumabek Ahmetuly: «Qazaq jylqynyń jalyn sıpamaı tańǵy asyn ishpegen» dep Hrýshevtiń buıryǵyn oryndaýdan bas tartqan. Sóıtip, elimizde jylqyny saqtap qalady. Keıin onyń sanyn kóbeıtýge kúsh salady», degen Zaýytbek aǵamyz jas kezinde komsomol uıymynda júrgende J.Táshenovtiń janynda kóp bolǵanyn áńgimeledi.
«Shyndyǵynda, ol kisi eshkimge qazaq jeriniń tutastyǵyn saqtap qalǵany jaıynda tis jarǵan emes. Bul onyń qaısar minezimen birge qarapaıym adam ekenin ańǵartady. Bir kezderi Jumabek aǵany áıgili akademık Ebineı Bóketov Qaraǵandyǵa alyp ketpekshi bolǵan. Biraq Jumekeń: «Meni ońtústik jurty alaqanyna salyp syılaıdy. Osy qurmetti qalaı umytamyn. Eshqaıda barmaımyn. О́lsem, súıegim osynda qalady», dep jaýap beripti. Osydan-aq daraboz azamattyń adamgershiligin kóresiz. Birde Baýyrjan Momyshuly ońtústikke kelgende Jumekeńnen memleketten bir marapat suraıtyn jónińiz bar dep qolqalap kóripti. Sonda aǵamyz:«Qazaq jeriniń bútindigin saqtap qalǵanym – meniń eń úlken marapatym», dep aıtqan eken», dedi Z. Turysbekov.
Jıynda ekonomıst-ǵalym Orazaly Sábden, kásipker, mesenat Serikjan Seıitjanov, belgili zańger Beket Turǵaraev, Muhtar Áýezov atyndaǵy Ońtústik Qazaqstan zertteý ýnıversıtetiniń basqarma tóraǵasy–rektor Darhan Ahmed-Zákı, О́zbekáli Jánibekov atyndaǵy OQPÝ rektory Gúljan Súgirbaeva jáne taǵy basqa azamattar baıandama jasap, kórnekti qaıratkerdiń ótken ónegeli ómirinen syr shertti.
Mazmundy is-shara barysynda konferensııaǵa qatysýshylar Jumabek Táshenovtiń eskertkishine gúl shoǵyn qoıdy. Eskertkish aldynda Shymkent qalasy ákiminiń orynbasary Sársen Quranbek pen J.Táshenov atyndaǵy ýnıversıtet rektory Qanat Baıbolov ult múddesin bárinen bıik qoıǵan alyp tulǵa týraly parasatty oı qozǵady.
Sondaı-aq ǵylymı konferensııaǵa qatysqan zııaly qaýym ókilderi qazaq jeriniń tutastyǵyn saqtap qalǵan Jumabek Táshenovke «Halyq qaharmany» ataǵy berilip, týǵan jeri Aqmola oblysy Arshaly aýdany birtýar qaıratkerdiń esimimen atalsa degen usynys aıtty.
ShYMKENT