OzgeEpic endi Oralda da bar

Kreatıv hab – zamanaýı óner men mádenı tendensııalardy, sıfrlyq óner men jańa tehnologııalardy toǵystyratyn alań. Al ÓzgeEpic haby osy baǵytta ınnovasııalyq jobalardy júzege asyryp, jastardyń shyǵar­ma­shylyq bastamalaryn damytýǵa úles qosyp kele jatqan tanymal orta.

– Búgin – óńirimiz úshin aıtýly kún. Oblystyń mádenı jáne shyǵarmashylyq damýyna tyń serpin beretin, jańa múm­kin­dik­terge jol ashatyn zamanaýı ÓzgeEpic Oral kreatıvti habynyń ashylýyna kýá bolyp otyrmyz, – deıdi Batys Qazaqstan oblysynyń ákimi Narıman Tóreǵalıev.

Qazir kreatıvti ındýstrııany damytý memlekettik saıasattyń basym baǵytynyń biri bolyp otyr. Ekonomıkanyń bul strategııalyq mańyzdy sektory 2029 jylǵa deıingi Ulttyq damý josparyna engizilgen. Prezıdent bıyl «Kreatıvti ındýstrııalardy damytý týraly» zańǵa qol qoıdy. Onyń maqsaty – kreatıvti ındýs­trııa ókilderiniń damýyna jaǵdaı jasaý. Kreatıvti ındýstrııany damytýdyń basty baǵyttardyń biri – kreatorlarǵa arnalǵan ınfraqurylym qurý.

– Mine, Prezıdent tapsyrmasyna sáıkes Oral qalasynda ashylyp otyrǵan kreatıvti hab – qazaq ónerin jańa deńgeıge kóterýge, básekege qabi­let­ti kreatıv ındýstrııany qalyp­tastyrýǵa baǵyttalǵan mańyz­dy bastama, – dedi óńir basshysy.

Qazaqstandaǵy tuńǵysh kreatıv hab retinde tanylǵan ÓzgeEpic endi Oral qalasynda da zamanaýı teatr, mýzyka, ádebıet, anımasııa, medıa, jasandy ıntellekt sııaqty baǵyttaǵy jańa jobalardy júzege asyrmaq. Sondaı-aq daryndy jastar úshin tálimgerlik pen kreatıvti bilim berý baǵdarlamalary qolǵa alynady.

Joba Batys Qazaqstan oblysy ákimdiginiń bastamasymen, Samruk-Kazyna Trust korporatıvtik qorynyń qoldaýymen jáne Qara­shyǵanaq Petroleým Opereıtıng B.V. kompanııasynyń áleýmettik ınvestısııalary aıasynda júzege asyrylyp otyr.

ÓzgeEpic ıdeıasynyń avtory Maqpal Jumabaıdyń ózi tanystyrǵan kreatıv habtyń 837 sharshy metrlik aýmaǵyn túgel aralap shyqtyq. Bul jobaǵa «Samruk-Kazyna Trust» qory 211 mln teńgeden asa qaıyrymdylyq qarjy quıǵan. Joba sheńberinde 200-ge jýyq kreatıv maman daıarlanady deıdi uıymdastyrýshylar. Olaı bolsa, óńirdiń shyǵarmashylyq áleýetin eselep arttyratyn qadam bolary sózsiz.

– Búgin daryndy jastar men shyǵarmashylyq sala mamandary úshin mańyzdy kún boldy. Sebebi halyqqa qajetti, suranystaǵy túrli kontent daıyndaıtyn ári kreatıvti mamandardyń kásibı orta­syn qalyptastyratyn orta paıda boldy. Oraldaǵy ortalyq – «Samuryq-Qazyna» qorynyń elimiz boıynsha ashqan úshinshi kreatıvti haby. Osyǵan deıin Aqtóbe men Petropavl qalalarynda paıdalanýǵa berildi. Jalpy, Batys Qazaqstanda keıingi tórt jylda 1,5 mlrd teńge bolatyn 16 áleýmettik joba jasadyq. Solardyń biri – jyl saıyn 700 erekshe bala kómek alatyn «Qamqorlyq» ońaltý ortalyqtary. Qazirgi tańda tasqyn saldarynan zardap shekken Jańaómir aýylynda kópfýnksıonaldy sport keshenin salý josparlanǵan. Bul da – qor kompanııalary tobynyń óńirlerdiń ınfraqurylymyn damy­týǵa, halyqty áleýmettik qoldaýǵa jasap jatqan qadamynyń biri, – deıdi «Samuryq-Qazyna» AQ korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektor Ǵıbrat Aýǵanov.

Jastarǵa arnalǵan jańashyl jobanyń basy-qasynda júrgen oblys ákiminiń orynbasary Baqytjan Narymbetov te ÓzgeEpic Oral krea­tıv habynyń ashylýy óńirdegi mádenı jáne ıntellektýaldyq áleýetti arttyrýǵa zor úlesin qosaryna senimdi. Onyń aıtýynsha, jańa keńistikte mádenıet pen tehnologııa salasyndaǵy ártúrli qyzmet baǵyttary bir alańda toǵysady.

Kreatıv habtyń ekojúıesinde konsert alańy, teatr, kınozal, kitaphana jáne ashana ornalasqan. Sonymen qatar galereıa, dárishana, kovorkıng keńistigi, óndiristik jáne medıa sehtar – foto, podkast jáne dybys jazý stýdııalary, túsirilim alańdary jumys isteıdi. Aıta keterligi, kreatıv habta óńirlik anımasııalyq stýdııa jumysyn bastap, mýltıplıkasııa mamandary daıarlanady. Bul aımaqtaǵy anımasııa baǵytyndaǵy alǵashqy kásibı stýdııa bolmaq.

– Ár óńirde kreatıv salanyń damýyna yqpal etetin keńistikterdi qurǵanda ol jergilikti jerdiń, sol aımaqtyń mádenı-áleýmettik ereksheligine negizdelýge tıis. Osyny eskere otyryp, tıisti zertteýlerden keıin habymyzdy ashtyq. Oral qalasyndaǵy ashylǵan kreatıv keńistik óńirlerdiń zııatkerlik áleýetin óz deńgeıinde kórsetetin, aımaqtardyń múmkindigin orta­lyq­pen teńestiretin, kreatıv ındýstrııany damytýdaǵy óńirlerdiń rólin aıqyndaıtyn biregeı alań bolady degen oıymyz bar, – deıdi ÓzgeEpic negizin qalaýshylar Maqpal Jumabaı jáne Toǵjan Qurmanjanqyzy.

Jańa ortalyqtyń tehnı­ka­lyq múmkindigi óte joǵary. Mysaly, mundaǵy beınetúsirý qural­darynyń sapasy halyqaralyq Oskar syılyǵyna usynylatyn fılmderdi túsirýge qabiletti. Bul jerde osyndaı apparattyń tórt toptamasy bar ekenin aıtty Maqpal Jumabaı. Iаǵnı bul jerde joǵary sapaly fılmder túsirýge, konsertter jazýǵa bolady. Sondaı-aq mundaǵy anımasııalyq stýdııa da eń zamanaýı kompıýterlermen jabdyqtalǵan. Joba demeýshileriniń biri «Samruk-Kazyna Trust» qory aldaǵy ýaqytta kreatıvti ındýstrııa salasynda 200 jańa maman daıarlaýǵa járdem bermek, sonyń ishinde 10 maman-anımatordy oqytý arqyly oblys­ta alǵashqy anımasııalyq stýdııa qurý josparlanǵan.

«Is tetigin maman sheshedi». Bul qaı zamanda da ózgermeıtin qaǵıda bolyp tur. Kadrdy júıeli daıarlaý, kreatıvti ındýstrııada bilim berý baǵdarlamalaryn damytý – Qazaqstan úshin strategııalyq qajettilik. Oral qalasynda ashyl­ǵan jańa ortalyq aımaqtyń shy­ǵar­mashylyq áleýetin, ekonomıkasyn básekege qabiletti ete túsedi deıdi ıdeıa avtorlary. Solaı bolǵaı!

Batys Qazaqstan oblysy