Almatydaǵy Dostyq úıinde Qazaqstan halqy Assambleıasynyń 30 jyldyǵyna arnalǵan keńeıtilgen otyrys ótti. Is-sharada Prezıdent Qasym-Jomart Toqaevtyń tapsyrmasy boıynsha qala ákimi etnomádenı birlestik ókilderine «Qazaqstan halqy Assambleıasyna 30 jyl» mereıtoılyq medalin tabystady, dep jazady Egemen.kz.
Marapat alǵandardyń qatarynda belgili qoǵam qaıratkerleri, eldegi etnosaralyq kelisimdi damytýǵa úles qosqan Assambleıa ardagerleri bar. Otyrysta sóz sóılegender Assambleıanyń sońǵy otyz jylda halyq dıplomatııasy men dıalogtyń pármendi ınstıtýtyna aınalǵanyn, «Áralýandyqtaǵy birlik» qaǵıdatyn nyǵaıtyp, jahandyq syn-qater jaǵdaıynda turaqtylyqtyń negizi bolyp otyrǵanyn atap ótti.
«Memleket basshysy Assambleıanyń halyqtyq dıplomatııanyń biregeı ınstıtýty retinde mańyzdylyǵyn árdaıym atap ótedi. 1995 jylǵy 1 naýryzda Almatyda – Qazaqstan táýelsizdiginiń besigi sanalǵan qalada – Qazaqstan halqy Assambleıasyn qurý týraly Qazaqstan Prezıdentiniń Jarlyǵyna qol qoıyldy. Dál osy qalamyzda keıinnen memlekettik saıasattyń bir bóligine aınalǵan jáne eldiń turaqtylyǵy men damýynyń basty faktoryna aınalǵan ultaralyq kelisim men birliktiń biregeı qazaqstandyq úlgisiniń irgetasy qalandy», dedi Almaty qalasynyń ákimi Erbolat Dosaev.
Marapattalǵandardyń atynan qatysýshylar joǵary memlekettik baǵa úshin alǵys aıtyp, beıbitshilik, birlik jáne azamattyq biregeılikti nyǵaıtý jolyndaǵy jumys jalǵasa beretinin jetkizdi. Baıandamashylar sózinde ultaralyq senim, tarıhı rızashylyq pen rýhanı birlik qundylyqtaryna erekshe nazar aýdardy.
Budan keıingi damýdyń mańyzdy baǵyty – etnomádenı birlestikterge arnalǵan zamanaýı ınfraqurylymdy qalyptastyrý bolmaq. Almaty qalasynyń ákimi Erbolat Dosaev shaharda jańa Dostyq úıin salý jospary bar ekenin málimdedi.
Sondaı-aq, Almatyda qalalyq QHA qoldaýymen tórt ulttyq teatr men jeti etnostyq BAQ redaksııasy tabysty jumys istep jatyr. Bul tilder men mádenıetti saqtap, ultaralyq dıalogty nyǵaıtýǵa yqpal etedi.
ALMATY