Taraz qalasyndaǵy «Jeńis» saıabaǵynda ótken «Jasyl el» eńbek jasaqtary maýsymynyń ashylý saltanaty «Taza Qazaqstan» ekologııalyq aksııasymen jalǵasty. Saıabaqqa kelgen jastar tóńirekti túgeldeı qoqystan tazartty.
«Stýdentterdi maýsymdyq jumysqa tartýdyń mańyzy zor. «Jasyl el» eńbek jasaqtary stýdentterdiń bos ýaqytyn tıimdi paıdalaný arqyly memlekettik jastar saıasatynyń júzege asýyna yqpal etedi. Qatysýshylar tóńirekti kógaldandyrýǵa, sport keshenderi men ózen jaǵalaýlaryn qalpyna keltirýge, saıabaqtar men qurylys alańdaryn tazalaýǵa úles qosady», deıdi oblystyq jastar resýrstyq ortalyǵynyń dırektory Aıbek Qadyralıev.
«Taza Qazaqstan» ekologııalyq aksııasy Taraz qalasy Jibek joly aýdanyna qarasty «Báıterek» shaǵyn aýdanynda, Qarahan kesenesi mańynda, Sarysý aýdanynyń ortalyǵy Jańatas qalasy men Moıynqum aýdanynda da ótkizildi. Bir sózben aıtqanda, ekologııalyq naýqanǵa óńirdiń barlyq aýdany qatysty.
О́ńirde naýryz aıynan bastap kóktemgi abattandyrý eki aılyǵy bastaldy. Ekologııalyq aksııa aıasynda «Taza qala», «Jasyl qala», «Taza kásip – taza aımaq», «Jer saǵaty», «Bolashaqty birge otyrǵyzamyz» sekildi is-sharalar turaqty túrde uıymdastyrylyp jatyr.
Ekologııalyq aksııaǵa, qorshaǵan ortany qorǵaýǵa jergilikti turǵyndarmen birge óńirge ózge memleketten kelgen týrıster de atsalysyp jatqany qýantady. Tarazǵa kári qurlyqtan kelgen ıtalııalyq týrıster de ekologııalyq aksııaǵa qatysyp, kóne shahardyń tazalyǵyna úles qosty. Olardyń ekologııalyq naýqanǵa qatysýyna «Ejelgi Taraz» memlekettik tarıhı-mádenı mýzeı qoryǵynyń ujymy muryndyq boldy. Meımandardyń aıtýynsha, tarıhy tereńde jatqan kıeli oryndardyń tóńiregin qoqystan tazartý – saýapty is.
«Eki myń jyldan astam tarıhy bar Tarazdyń kez kelgen tarıhı orny tańdaı qaqtyrmaı qoımaıdy. Alǵan áserimizdi sózben jetkizý qıyn. Mundaǵy qasıetti jerlerge kóshet otyrǵyzý baqyty bizge buıyrǵanyna bek qýanyshtymyz. Kóne qalaǵa jylyna kem degende on myńdaǵan týrıst keletin bolar. Solardyń árqaısysy bir kóshetten otyrǵyzsa, onyń nesi aıyp? Qaıta tarıhy tereń qalanyń mańaıy jasyl jelekpen kómkeriledi», deıdi ıtalııalyq meımandar.
Jalpy, óńirde aksııa aıasynda 818 shaqyrym kanal men aryq júıeleri, 125 myń turǵyn úı aýlasy, 4,5 myń shaqyrym kóshe tazalanyp, 12 myń tonna qoqys shyǵaryldy. Bıyl egiletin 195 myń taldyń búginge deıin 70 myńǵa jýyǵy otyrǵyzylyp, 2,4 myń aǵash butalandy. 60 tarıhı-mádenı eskertkish, 143 saıabaq pen skver aýmaqtary turaqty túrde qoqystan tazartylyp otyrady. Bul jumystarǵa 910 birlik tehnıka jumyldyrylǵan.
Jambyl oblysy