«Týrızm – aımaqtardyń damýyna serpin beretin sala bolýǵa tıis», dedi Memleket basshysy Qasym-Jomart Toqaev Ulttyq quryltaıdyń IV otyrysynda. Ol úshin kórikti jerlerdiń shyraıyn ashyp, salany jan-jaqty damytýǵa kóńil bólý qajet. Sonyń bir baǵyty – iskerlik, oqıǵaly týrızm.
Qazir oqıǵaly týrızmdi damytýǵa jan-jaqty kóńil bólinip keledi. Sonyń biri retinde «kazakhstan.travel» ulttyq týrıstik portalynda is-sharalardyń biryńǵaı kúntizbesi jarııalanǵanyn aıtsaq bolady. Onda týrısterdi qyzyqtyratyn túrli formattaǵy is-sharalar engen. Byltyr sol keste boıynsha 137 aýqymdy is-shara ótip, onyń 80%-y
Astana, Almaty qalalarynda uıymdastyryldy. Týrızm jáne sport mınıstrligi ákimdiktermen birlesip, ár oblysta ótetin osyndaı iri is-sharalardy turaqty túrde kúntizbege engizip otyrýǵa nıetti. Mınıstrlikke qarasty Týrızm ındýstrııasy komıteti týrızm salasyndaǵy júıeli is-sharalardy júzege asyrý basqarmasynyń basshysy Nurbol Baıjanov is-sharalardy jyl saıyn ótkizýdiń mańyzy týraly áńgimeledi.
«О́ńirde ótetin is-sharalar dástúrge aınalyp, jurtshylyq asyǵa kútetindeı bolýǵa tıis. Túrli ataýly kúnderdi turaqty negizde ótkizip, oraıy kelse olardy halyqaralyq kúntizbege qosý qajet. Sodan soń jarnamalaý arqyly óńirge shetelden keletin týrısterdiń sanyn arttyrýǵa bolady. Jýyrda Týrızm jáne sport mınıstri Erbol Myrzabosynov ár aımaqta jylyna týrısterdi tartatyn kem degende bir aýqymdy is-shara ótkizýdi usyndy. Osy jaqsy bastama óńir týrızmin ilgeriletýge oń áser etedi degen senimdemiz», deıdi N.Baıjanov.
Mınıstrliktiń habarlaýynsha, elde oqıǵaly týrızmmen qatar, iskerlik týrızmdi damytýǵa da áleýetimiz jetedi. Bul baǵytta atap aıtarlyqtaı jetistikterimiz bar. Mysaly, kongrester men konferensııalardyń halyqaralyq qaýymdastyǵymen belsendi yntymaqtastyq ornaǵan. Esesine, jyl saıyn elimizde aýqymdy is-shara ótkizýdiń múmkindigi týyp otyr. Keıingi úsh jylda elimizde halyqaralyq deńgeıdegi 21 is-shara uıymdastyryldy. Bıyl IFLA, Walter E. Dandy, ISAAK, IGCGD, New Silk Road Network jyl saıynǵy kezdesýin qosa alǵanda, taǵy 5 iri halyqaralyq is-shara ótkizý josparlanǵan.
Byltyr elimizde 5180 sheteldik delegattyń qatysýymen 14 halyqaralyq is-shara ótti. Orta eseppen alǵanda qonaqtardyń árqaısysy shamamen 4000 AQSh dollaryn jumsaǵan. Osy is-sharalardan túsken kiristerdiń jalpy somasy 20,7 mıllıon dollardan asqan. Bul qarajatqa ushý, turý, tamaqtaný, basqa da shyǵyndar kiredi.
«Astana iskerlik, oqıǵaly týrızmniń negizgi ortalyqtarynyń birine aınalyp keledi. Aldaǵy aılarda elordada birqatar aýqymdy halyqaralyq is-sharalar ótkizý josparlanǵan. Mysaly, maýsymda AQSh, Kanada, Reseı, Eýropa, Azııadan 500 jetekshi maman qatysatyn H dúnıejúzilik neırohırýrgııalyq qaýymdastyq kongresi ótedi. Shildede Nazarbaev ýnıversıteti halyqaralyq sarapshylar qoǵamynyń kongresin qabyldaıdy. Oǵan myńdaǵan qatysýshy keledi. Tamyzda Astana «IFLA» dúnıejúzilik kitaphana jáne aqparattyq kongresin ótkizý alańyna aınalady. Kitaphana salasyndaǵy eń iri oqıǵaǵa álemniń 130-dan astam elinen 4000-ǵa jýyq delegat jınalmaq. Atalǵan MISE is-sharany ótkizý Astanaǵa shamamen 2 mln eýro tabys ákeledi dep kútilip otyr. Jıyntyq paıda delegattardyń turýǵa, kólikke, tamaqtanýǵa, basqa da qyzmetterge jumsaǵan shyǵyndarynan quralady», deıdi N.Baıjanov.
Iskerlik, oqıǵaly týrızmdi uıymdastyrýǵa Astana qalasy taptyrmas oryn. Qalanyń halyqaralyq deńgeıdegi is-shara ótkizýde tájirıbesi mol. Qonaqúılerinde 10 myńnan astam jıyntyq nómir qory bar. 120-dan astam mádenı, oıyn-saýyq nysany jumys isteıdi. Sonymen qatar elorda 16 elmen (27 baǵyt) tikeleı áýe qatynasyn ornatqan. Úkimet deńgeıinde qabyldanǵan osyndaı is-sharalardyń nátıjesinde elordanyń týrıstik salasy turaqty ósim kórsetken. Aıtalyq, byltyr ishki týrıster sany 10,5 mln adamdy qurap, 2023 jylmen salystyrǵanda 900 myńǵa artqan. Shetelden kelgen týrıster sany – 15,3 mln. Bul statıstıkada jumysqa nemese elde turaqtap qalýǵa kelgender esepke alynbaǵanyn da eskergen jón.