Astanadaǵy Saryarqa aýdanynyń ákimi bolyp Janasyl Shaýkentaev taǵaıyndaldy, dep habarlaıdy Egemen.kz elorda ákimdigine silteme jasap.
«Astanada Prezıdent ákimshiliginiń jáne qalalyq máslıhat depýtattarynyń kelisimi boıynsha merıtokratııa qaǵıdatyna sáıkes Saryarqa aýdanynyń ákimi taǵaıyndaldy. Bul laýazymǵa «Astana qalasy ákiminiń apparaty» MM basshysynyń eks-orynbasary Janasyl Shaýkentaev kiristi», delingen ákimdiktiń Telegram-daǵy arnasynda jarııalanǵan habarlamada.
Janasyl Shaýkentaev 2014 jyldyń qarasha aıynan bastap Astana qalasynyń ákimdiginde túrli laýazymdardy atqarǵan: qalanyń Jer qatynastary basqarmasy, qala ákiminiń apparaty, qalanyń memlekettik sáýlet-qurylys baqylaý basqarmasy jáne t.b.
Keıingi jyldary «Astana qalasy ákiminiń apparaty» MM memlekettik-quqyqtyq bóliminiń basshysy, «Astana qalasy ákiminiń apparaty» MM basshysynyń orynbasary bolǵan.
Memleket basshysynyń tapsyrmalary aıasynda Astana ákimi Jeńis Qasymbek aýdan men eldi mekenderdi damytý boıynsha birqatar mindet júktegen.