Jumysshy mamandyqtary jyly jastardy kásiptik-tehnıkalyq bilimge baýlyp, biliktiligin arttyrýǵa jol ashady. Kásibı deńgeıi joǵary maman qaı salada da suranyssyz qalmaıdy. Syr boıynda ataýly jyl aıasynda birqatar ıgi bastama júzege asty.
Qorqyt ata atyndaǵy Qyzylorda ýnıversıteti ınjenerlik, aýyl sharýashylyǵy, qurylys, IT jáne óndiristik tehnologııalar salalary boıynsha stýdentterdi tájirıbelik oqytýǵa basymdyq berip otyr. Oqý ornynda jumysshy mamandyqtarynyń mańyzdylyǵy keńinen nasıhattalyp, jastardyń qyzyǵýshylyǵyn arttyrý maqsatynda túrli kórmeler, semınarlar men forýmdar uıymdastyrylady.
Oblysta jumysshy mamandyqtaryn ıgergen jastarǵa «Jumyspen qamtý jol kartasy», «Damý» memlekettik baǵdarlamalary aıasynda túrli granttar usynylyp, jumysqa ornalasý múmkindikteri keńeıtildi. Alda qurylys salasyn jandandyratyn birneshe is-shara josparda tur. Oqý orny stýdentterdiń qurylys jasaǵyn qaıta jańǵyrtyp, jastardy osy iske jumyldyrdy. Aımaqtaǵy jumys kúshin kóp talap etetin saladan stýdentter qarjy taýyp, tájirıbe jınaqtaıdy.
Oblysta orta býyn mamandar daıarlaıtyn oqý ornynyń biri – I.Ábdikárimov atyndaǵy Qyzylorda agrarlyq-tehnıkalyq joǵary kolledji. Kásiptik-tehnıkalyq bilim sapasyn jetildirý baǵytynda oqý orny óndirisshilermen tyǵyz baılanys ornatyp, olardyń talaptaryna sáıkes mamandar daıarlaýǵa basymdyq berip otyr. Sonymen qatar, dýaldy oqytý júıesin damytý arqyly túlekterdiń tájirıbelik daǵdylaryn arttyrýǵa erekshe kóńil bólingen. Kolledj dırektorynyń oqý-óndiristik jumystar jónindegi orynbasary Maǵrıpa Aıtenova búginde oqý orny 34 mamandyq, 35 biliktilik boıynsha orta býyn tehnıkalyq mamandaryn daıarlap, el ekonomıkasynyń suranysyna saı maman daıarlaıtynyn aıtady.
«Kolledj óńirge ınvestısııa salǵan Germanııanyń «Seven Rivers» kompanııasymen áriptestik ornatyp, shyny zaýytyn salý jobasyna qajetti tehnıkalyq mamandardy daıarlaý maqsatynda arnaıy bilim baǵdarlamasyn ázirledi. Bul aımaqtyń óndiristik áleýetin arttyryp qana qoımaı, túlekterdiń jumysqa ornalasý múmkindikterin de keńeıtedi. Kolledj halyqaralyq tájirıbe almasý baǵytynda da belsendi. Byltyr jeltoqsan aıynda oqý orny AQSh-tyń Florıda shtatynda ornalasqan NSSER biliktilikti baǵalaý ortalyǵynyń halyqaralyq akkredıtasııasynan sátti ótti. Akkredıtasııa aıasynda kolledjdiń 11 bilim alýshysy «Elektrmontajdaýshy» quzyrettiligi boıynsha halyqaralyq sertıfıkatqa ıe boldy», dedi Maǵrıpa Mahmutqyzy.
Qaladaǵy «Orda» joǵary kolledjinde de stýdentterdiń kásibı daǵdylaryn damytýǵa qatysty birneshe joba jasalǵan. Kolledj dırektorynyń orynbasary Araılym Qonaqbaeva 2023 jyly sheberlikti shyńdaý maqsatynda Germanııa men Shveısarııadan bilikti tálimgerler shaqyrylǵanyn aıtady. Germanııalyq maman stýdentterge óz elinde avtokólikti jóndeý, tehnıkalyq qyzmet kórsetý salasynda kóp jyldyq tájirıbesi bar bilikti maman retinde dáris berdi, shveısarııalyq maman IT salasyndaǵy baǵdarlamalaý negizderinen bastap, kásibı deńgeıge deıingi oqytý júıesin engizdi.
«Kolledjde gaz qubyrlaryn ornatý boıynsha bilim alyp jatqan jastar óńirge asa qajet. Olardyń deni kolledjdi bitirmeı jatyp, tájirıbeden ótý kezinde jumys taýyp alady. Kásiporyndarmen kelisim jasasý maman sapasyna da serpin berip otyr. Burynnan da bar osy dástúr Jumysshy mamandyqtary jylynda jańǵyra tústi», – deıdi A.Qonaqbaeva.
Mamandardyń aıtýynsha, túlekterdiń jumysqa ornalasý kórsetkishi jaqsy. Ásirese dánekerleýshi mamandyǵyn bitirgender dalada qalmaıdy, jalaqylary da joǵary. Elektrık mamandyǵyn bitirgenderdiń kópshiligi aılyqtyń azdyǵynan salaǵa bara bermeıdi. Kolledj oqytýshylary osy máseleni aımaqtaǵy óndiris orny jetekshilerimen «Atameken» kásipkerler palatasy alańyndaǵy kezdesýlerde jıi kóterip keledi.
QYZYLORDA