Qallekı sahnasynda «Sheńber» atty jańa qoıylymnyń saltanatty premerasy ótti. Spektakl nemis dramatýrgi Bertold Brehtiń álemge áıgili «Kavkazdaǵy borly sheńber» pesasynyń jelisimen sahnalanǵan.
Qazaq tiline Zulqarnaı Saqıuly kórkem tilmen aýdarǵan týyndyny, rejısser Ulan Qabyl jańa kózqaraspen túrlendirip kórdi. Shyǵarmashylyq ujymnyń izdenisin, ózgeshe baǵyttaǵy qoıylymyn kórermen joǵary baǵalady.
«Sheńber» – ádildik pen analyq mahabbat jaıly syr shertetin tereń týyndy. Jaı qoıylym emes, ol – adamdyq qasıetterdi, júrek jylýyn jáne ananyń aıaly alaqanyn dáripteıtin shynaıy sahnalyq syr», deıdi rejısser.
«Qalleki» teatr laboratorııasynyń bul týyndysy teatrsúıer qaýymnyń qyzyǵýshylyǵyn oıatyp, erekshe yqylasqa bólendi. Epıkalyq drama janrynda qoıylǵan shyǵarma san túrli sezimge bólep, ýaqyt pen keńistiktiń shekarasynan tys adamzattyq qundylyqtardy oı eleginen ótkizýge shaqyrady. Qoıylym barysynda Brehtiń oqshaýlaný ádisi qoldanylǵan, bul akterlik oıyn men kórermen arasyndaǵy qarym-qatynasty jańa deńgeıde uǵynýǵa múmkindik beredi. Adamgershilik pen ádilettilik týraly tereń oıǵa jetelep, jalpy adamzattyq qundylyqtarǵa úndeıdi.
«Bizge Brehti túsindirgen – Bolat Atabaev. Kezinde ózi qoıǵan kezde spektakl úlken synǵa qalǵan eken. Endi búgingi premerada biz sol Brehtke jete aldyq pa, álde jete almadyq pa – kórermenge aıan», deıdi Ulan Qabyl.