Soltústik Qazaqstan oblysy men Reseıdiń Qorǵan aımaǵy japsarlas jatyr. Qorǵan, aty aıtyp turǵandaı, ejelden qazaq halqynyń ókilderi kóp turǵan óńirlerdiń biri. Qazirdiń ózinde ondaǵy halyqtyń 12%-y qazaqtar. Kezinde 15-16%-ǵa jetken jyldary da bolǵan. Kóptegen qandasymyz tarıhı Otanyna oralyp, qazaq halqynyń úlesi jyldan-jylǵa azaıyp keledi.
Soltústik Qazaqstan oblysynyń aýmaǵy 98 myń, Qorǵan oblysynyń aýmaǵy 71,5 myń sharshy shaqyrym. Bizdegi halyq sany 540 myńdaı bolsa, Qorǵanda 744 myń halyq ómir súredi. Qazir eki óńirdiń de halqy azaıý ústinde. Soltústik Qazaqstannyń halqy 2020 jyly 548 myń adam bolsa, qazir 540 myńǵa túsken, Qorǵan oblysynda 2002 jyly halyq sany bir mıllonnan assa, qazir 740 myńnyń tóńireginde. Qorǵan oblysynyń aýmaǵynda temir ken oryndary mol, tipti tıtan-sırkonıı ýchastoktary da tabylǵan. Sonymen birge ónerkási birshama jaqsy damyǵan. Bizdiń oblysymyzdaǵy negizgi ónerkásip oryndarynyń bári áskerı-ónerkásiptik kesheniniki bolyp, keńes odaǵy qulaǵanda olarǵa suranys joǵalyp, zaýyttar toqyrap qalsa, Qorǵannyń beıbit ómirdiń ónimderin shyǵaratyn kásiporyndary saqtalyp qalǵan.
Keıingi bes jylda eki oblystyń arasyndaǵy taýar aınalymy 1,6 ese ósip, 700 mln dollar kólemine jetti. Biraq onyń ekijaqqa tıimdi jaǵdaıda budan da kóbirek ósýge múmkindigi bar. Jýyrda Soltústik Qazaqstan oblysynyń ákimi Ǵaýez Nurmuhambetov bastaǵan resmı delegasııa Qorǵan oblysy gýbernatorynyń shaqyrýymen Reseı Federasııasyna saparlap bardy. Onyń nátıjeli bolýyna Qazaqstannyń Reseıdegi Tótenshe jáne ókiletti elshisi D.Abaev pen Qazaqstannyń Ekaterınbýrg qalasyndaǵy Bas konsýly J.Mamytbekov úles qosty.
Qorǵan oblysynyń gýbernatory Vadım Shýmkovpen ótken kezdesýde ekijaqty áriptestikti odan ári keńeıtý keleshegi talqylandy. Osy maqsatta saýda-ekonomıkalyq, ǵylymı-tehnıkalyq, gýmanıtarlyq salalardaǵy yntymaqtastyq týraly ekijaqty kelisimderge qol qoıyldy.
Bıznes-bastamalar men birlesken ınvestısııalyq jobalardy júzege asyrý máselelerine erekshe kóńil bólindi. Bul taqyryptar shekaralas eki oblystyń isker toptarymen ótken dıalogtyń ózegine aınaldy. Soltústik Qazaqstan men Qorǵan oblysynyń kásipkerleri B2B formatynda máselelerge naqtyraq toqtaldy.
Qol qoıylǵan qujattar arasynda – bizdiń oblys pen Qorǵan oblysynyń saýda-ónerkásip palatasy arasyndaǵy kelisim, «Soltústik» ÁKK janyndaǵy ınvestorlardy qoldaý jáne ınnovasııalardy damytý ortalyǵy men «Agrokompleks Kýrgansemena» JShQ arasyndaǵy memorandým, sondaı-aq «Kýrgandormash» AQ men «Qyzyljar» AEA arasyndaǵy yntymaqtastyq týraly memorandýmdar boldy. Kommýnaldyq jáne arnaıy tehnıka shyǵaratyn «Kýrgandormash» «Qyzyljar» arnaıy ekonomıkalyq aımaǵynda kásiporyn ashýdy josparlap otyr.
О́ndiristik áleýetti tereńirek zerdeleý maqsatynda bizdiń delegasııa «Kýrgandormash», «Kýrganstalmost», «Vezdehody Býrlak» kásiporyndary men ındýstrııalyq parkine baryp, óndiris úderisterimen tanysty. Bul nysandar ónerkásiptik kooperasııa men tehnologııa almasý turǵysynan praktıkalyq qyzyǵýshylyq týdyrdy.
Sonymen qatar oblys ákimi Ǵaýez Torsanuly Qorǵanda turatyn qazaq dıasporasymen jyly júzdi kezdesý ótkizdi. Júzdesý barysynda qoldaý, bilim berý jáne mádenı baılanystardy keńeıtý máseleleri qozǵaldy.
Sapar barysynda oblys ákimi Reseı Federasııasynyń Qorǵan oblysynyń shekarasyna deıingi respýblıkalyq avtojoldy qaıta jańartý jumystarynyń barysyn tekserdi. «Qazavtojol» AQ salyp jatqan joldyń qurylysy belgilengen merzimde aıaqtalmaı, sozylyp ketken edi. Ǵ.Nurmuhambetov jumysty qarqyndy júrgizý úshin jańa merdigermen qol qoıylyp, onyń jóndeý jumystaryna kiriskenin eskertti.
Jol «Jańajol» shekaralyq ótkizý-tekserý pýnktte aparady, ony da bıyl aýqymdy qaıta jańǵyrtý josparlanǵan. Joba aıasynda jańa qurylystar salý, kireberis, shyǵý baǵyttaryn bólý, joldy tórt jolaqty etip keńeıtý, zamanaýı tekserý júıelerin engizý jáne jaraqtar ornatý kózdelgen. Munyń barlyǵy shekaradan ótetin azamattarǵa qolaıly jaǵdaı jasap, ótý ýaqytyn aıtarlyqtaı qysqartýǵa baǵyttalǵan.
Soltústik Qazaqstan oblysy