Maıly daqyldyń mańyzy zor

О́ńirdegi egistik alqaptardyń basym bóligi – dándi jáne maıly daqyldar. Astyq daqyldary arasynda bıdaı men arpa negizgi oryn alady. Keıingi jyl­dary suranystyń artýyna baılanys­ty maıly daqylǵa, ásirese kúnbaǵys pen rapstyń egis kólemi ulǵaıdy. Bul daqyl­dardan alynatyn ónimder ishki naryqty qamtamasyz etip qana qoımaı, eksportqa da shyǵarylady.

Aýyl sharýashylyǵy basqarmasy­nyń basshysy Ertaı Qýanbaevtyń málime­tinshe, kóktemgi egis jumysy barlyq aýdanda bastalǵan. Oǵan 12 900 tehnıka jumyldyrylǵan. Bıyl óńirde 753,1 myń gektar alqapqa (ótken jylmen salys­tyr­ǵanda 3,6 myń gektar artyq) aýyl sharýa­shylyǵy daqyldary egilmek. 46,2 myń tonna tuqym daıyndalǵan. 27,5 myń tonna arzandatylǵan dızel otyny da bólindi.

Jýyrda oblys ákimi Berik Ýálı jumys saparymen Borodýlıha aýdanyna baryp, óńirdegi iri agroqurylymdardyń biri – «Lazarev ı K» JShS-niń kóktemgi dala jumystary barysymen tanysty. О́ńir basshysy sharýashylyqtyń egis alqabyn aralap, aýyl sharýashylyǵy óndirisindegi ozyq tehnologııalar men jańa tásilderdiń qoldanylýyna nazar aýdardy. Qazir seriktestik ósimdik jáne mal sharýashylyǵyn qatar damytyp otyr. Ieliginde 13 myń gektardan astam jeri bar qurylymnyń 10 myń gektaryna jýyq bóligine bıyl egin salynbaq.

«Sharýashylyq maıly daqyldardy óńdeýge basymdyq berip, kúnbaǵys maıyn Qytaıǵa eksporttaıdy. Bıyl 4 000 gektarǵa kúnbaǵys, 6 00 gektarǵa zyǵyr jáne raps egý josparlanǵan. Daqyldardyń sapasyn arttyrý úshin dron arqyly sebý tásili alǵash ret engizildi. Keler jyly kóktemgi ylǵal tolyq keppeı turyp, dál osy ádispen raps egýge nıetti. Sonymen qatar usaq dándi daqyldardy sebýge arnalǵan jańa tehnıka satyp alynǵan», deıdi seriktestik mamandary.

Olardyń aıtýynsha, seriktestikte mal sharýashylyǵy baǵyty da qarqyndy damyp jatyr. 1 500-ge jýyq iri qara mal bar. 100 adam turaqty jumyspen qamtylǵan. Tuqymdyq óńdeý men organı­kalyq tyńaıtqysh engizý júıesi de jolǵa qoıylǵan. Qytaı mamandarymen birlesip kúnbaǵys býdanyn alý jolǵa qoıylypty.

Abaı oblysy,

Borodýlıha aýdany