Sharýashylyǵy órkendegen Sheńgeldige arnaıy atbasyn burǵan Qonaev qalasynyń ákimi Ashat Berdihanov birneshe sharýa qojalyqtarynyń jumysymen tanysty, dep habarlaıdy Egemen.kz.
Onyń alǵashqysy - «Smart Adam Agro» JShS. Bul seriktestik jalpy aýdany 900 gektar aýmaqty ıgermek nıette. Qazir egistikte jońyshqa, qyzanaq egilgen. Kompanııa 7 dana aýyl sharýashylyǵy tehnıkasyn satyp alǵan. Jańbyrlatyp sýarý júıesin de qoldanysqa engizgen. Jalǵyz másele – elektr energııasyn paıdalaný úshin qujattardy rásimdeý. Bul jóninde ákim jelilerdiń qaı mekemege tıesili ekenin anyqtap, qoldaý kórsetýdi tapsyrdy.
Odan keıin shahar basshysy túrli jemis-jıdek ósirýmen aınalysatyn «Bolashaq» sharýa qojalyǵyna bardy. Qojalyq aýmaǵy 20 ga jerge tamshylatyp sýarý júıesin júrgizgen. Atap aıtqanda, 10 ga jerge qaraqat, 6 ga baqsha daqyldary, 4 ga jerge kókónister egildi. 2026-2027 jyldary qaraqattyń egý alańyn 30 gektarǵa ulǵaıtý josparlanýda. Aldaǵy ýaqytta qaraqatty óńdep, djem men tosap óndirýge arnalǵan shaǵyn sehty iske qosý kózdelýde. Sonymen qatar sharýa qojalyq basshylyǵy agrotýrızmdi damytýdy josparlaýdy qolǵa almaq nıette.
«Sharýalardy memlekettik qoldaýdyń barlyq tetikterin paıdalanǵan durys. Qojalyqqa qosymsha jer telimin berýdi qarastyrý qajet. Jaqynarada aýksıon jarııalansa, habar berip, baılanysty úzbeý kerek. Aýyl damysa, elimizdiń de damyǵany», - dedi Ashat Berdihanov.
Al «Marıam» sharýa qojalyǵy bolsa, aýmaǵy 230 ga jerge tamshylatyp sýarý júıesin engizdi. Egistikte baqsha daqyldary, júgeri, jýa egilgen. Sý únemdeý tehnologııasyn engizý maqsatynda somasy 70 mln.teńgege syıymdylyǵy 7000 tekshe metrlik sý jınaý basseıni men sorǵylar ornatylǵan. Aldaǵy jyldary egiletin kókónis aýmaǵyn 100,0 ga ulǵaıtý josparlanýda. Kompanııa basshylyǵy «Keń dala» baǵdarlamasy aıasynda somasy 40 mln.teńgege qujattar tapsyrdy.
Bıyl Sheńgeldide aýyl sharýashylyǵy daqyldarynyń egis kólemi 8 150,6 gektardy quraǵan.
Almaty oblysy.