«AqylTech» jáne «IT-Aiel» onlaın oqytý baǵdarlamalaryna resmı túrde tirkeý bastaldy. Atalǵan bastama – jastar men áıelderdiń qarjylyq, sıfrlyq jáne jasandy ıntellekt salalaryndaǵy daǵdylaryn damytýǵa baǵyttalǵan. Baǵdarlamalar Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń, Mádenıet jáne aqparat mınıstrligi Jastar jáne otbasy isteri komıtetiniń, sondaı-aq «Astana Hub» halyqaralyq tehnoparkiniń qoldaýymen júzege asyrylady.
«Technowomen» KEU basqarma tóraǵasy Azıza Shójeevanyń aıtýynsha, elimizdegi jastardyń 40 paıyzy jeke qarjysyn basqara almaıdy. Al 20 paıyzdan astamynyń merzimi ótken qaryzdary bar. Sonymen qatar halyqtyń 40 paıyzynyń sıfrlyq tehnologııalardy qoldaný daǵdylary jetkiliksiz. Sondyqtan baǵdarlamanyń negizgi maqsaty – jastardy qarjyny saýatty basqarýǵa, kıberqaýipsizdik negizderin ıgerýge, sıfrlyq gıgıenany saqtaýǵa jáne jasandy ıntellekt kómegimen tabys tabýǵa úıretý.
«IT-Aiel» baǵdarlamasy – dekrettegi, kópbalaly, jumyssyz otyrǵan, ózin damytqysy keletin qyz-kelinshekterge arnalǵan. Baǵdarlama qatysýshylardy sıfrlyq quraldardy meńgerýge, frılans pen onlaın-bıznesti bastaýǵa, jasandy ıntellektini otbasy ekonomıkasynda qoldanýǵa jáne ınternet alaıaqtarynan qorǵanýǵa úıretedi.
«Astana Hub» ókili Valerııa Tıo jobanyń naqty nátıjelerge baǵyttalǵanyn atap ótti. Onyń aıtýynsha, 2023 jyly baǵdarlamanyń alǵashqy legine 2634 áıel qatyssa, 2024 jyly ekinshi lekke 5200-den astam ótinish kelip, 3084 qatysýshy oqýyn bastaǵan. Baǵdarlama «No Code», «E-commerce», «AI»-dızaın, frılans, vıdeomontaj sııaqty salalardy qamtıdy. Barlyǵy qazaq jáne orys tilderinde, onlaın formatta, mentorlyq qoldaýmen ótkiziledi.
Baǵdarlama seriktesteriniń biri «YASSA Education» kompanııasynyń negizin qalaýshy Krıstına Veber «IT-Aiel» oqýy aıasynda meńgeriletin kásipter týraly naqty túsindirip ótti. «Baǵdarlama qazirgi naryqta joǵary suranysqa ıe, tehnıkalyq baza talap etpeıtin jáne tez monetızasııalaýǵa bolatyn mamandyqtar. Olardyń ishinde chat-bot jasaýshy, «AI»-grafıkalyq dızaıner, vıdeomontajdaýshy, avtomattandyrý boıynsha assıstent, promt-ınjener, baǵdarlamalyq qamtamasyz etý testeri sekildi kásipter bar. Ár modýl – tájirıbelik baǵytta, naqty tabysqa jetkizetin quraldarmen qurylymdalǵan», deıdi ol.
Baǵdarlamanyń qarjylyq saýattylyq blogin júrgizip otyrǵan mentor ári kásipker Alýa Kórpebaeva qarjylyq bilimniń mańyzyn erekshe atap ótti. «Búginde jastar bıznes bastaýǵa nıetti bolǵanymen, kiris pen shyǵysty esepteý, salyq júıesin túsiný, tıimdi qarjylyq model jasaý sııaqty negizgi daǵdylardy meńgermegen. Bizdiń kýrs qatysýshylarǵa sandardan qoryqpaı, ony basqarýǵa úıretedi», deıdi ol.
Baǵdarlama túlekteriniń biri Álııa Orazymbetova «IT-Aiel» jobasyna qatysý onyń ómirin jańa baǵytqa burǵanyn aıtady. «Bul joba meni jańa salaǵa jetelep qana qoımaı, «CyberBala» atty balalarǵa arnalǵan sıfrlyq gıgıena klýbyn qurýyma sebep boldy. Osy arqyly qoǵam aldyndaǵy jaýapkershiligimdi sezindim», deıdi ol. Álııanyń sózinshe, «IT» salasynda áıel adamdardyń kóbeıýi zaman talaby.
«AqylTech», «IT-Aiel» baǵdarlamalarynyń taǵy bir ereksheligi – barlyq óńirdi qamtýy. Oqý elimizdiń 17 oblysy men Astana, Almaty, Shymkent qalalarynda qoljetimdi. Baǵdarlama tolyqtaı tegin, onlaın formatta júrgiziledi. Maqsat – 10 000-nan astam adamdy oqytyp, 100-den astam bilikti trenerdi daıarlaý.
Baǵdarlamany uıymdastyrýshylardyń aıtýynsha, jasandy ıntellektiniń 2030 jylǵa qaraı álemdik ekonomıkaǵa qosatyn úlesi 15,7 trln dollardy quraýy múmkin. Sondyqtan elimizde JI-di damytý tujyrymdamasy jasalyp, qazaq tilindegi úlgilerin damytý, otandyq startaptardy qoldaý baǵytynda naqty jumys júrip jatyr. Jasandy ıntellekt endi tek tehnologııa emes, otbasylyq ekonomıkaǵa naqty paıda ákeletin quralǵa aınalýǵa tıis.
Atalǵan baǵdarlamalar jaı oqytý kýrstary emes, sıfrlyq dáýirge beıimdelýdiń, zamanmen úndesýdiń, jańa tabys kózin tabýdyń naqty jolyna aınalyp otyr.