Almatydaǵy Astana alańynda «Jastar Rýhy» JQ bastamasymen salaýatty ómir saltyn dáripteıtin «Chempıondyq rýh» jobasy aıasynda keń aýqymdy tańǵy jattyǵý ótti, dep habarlaıdy Egemen.kz.
Sharanyń basty maqsaty – jastar men qala turǵyndaryn sportqa baýlý, belsendi ómir súrýdi nasıhattaý jáne tańǵy jattyǵý mádenıetin qalyptastyrý.
Tańǵy saǵat 08:00-de bastalǵan jattyǵýǵa qala turǵyndary men uıym jastar, sondaı-aq Prezıdent janyndaǵy Memlekettik basqarý akademııasynyń qaıta daıarlaý kýrsynda daıarlaýdan ótip jatqan memlekettik qyzmetshiler qatysty. «Chempıondyq rýh» jobasy – bul tek jattyǵý ǵana emes, ol – jeńiske jetýge degen umtylystyń, ishki tártip pen rýhtyń sımvoly. Osy joba Almaty qalasynan bastaý alyp, elimizdiń barlyq oblystarynda jalǵasyn taýyp keledi. Jobany qoldaý maqsatynda sharaǵa elimizdiń tanymal sportshylary qatysyp óz tájirıbesimen bólisti.
Igi sharanyń qonaǵy, kásipqoı boksshy, orta salmaqtyń serkesi Qanat Islam tańǵy jattyǵýǵa arnaıy qatysty.
«Men rıngte kóp qarsylaspen betpe-bet keldim, biraq eń úlken qarsylas – ózimizdiń erinshektigimiz ben qorqynyshymyz. Tańǵy jattyǵý arqyly biz ózimizdi jeńemiz. Osyndaı jobalar jas urpaqqa úlken serpin beredi. Eger ár tańdy qozǵalyspen bastasań – seniń kúniń ǵana emes, búkil bolashaǵyń jeńiske jeteleıdi», dedi Q.Islam.
«Chempıondyq rýh» jobasynyń ambassadory Nursultan Orynbasarov sportty serik etý sergektikke bastaıtynyn jetkizdi.
«Chempıon bolý úshin tek rıngte jeńý az. Chempıondyq – bul kúndelikti tártip, tańdy erte turyp, óz-ózińmen kúresý, rýhanı tózimdilik. Biz osy jobamen jastarǵa bir nárseni aıtqymyz keledi: jeńis ár adamnyń ishinde, ony oıatý – óz qolyńda. Tańǵy jattyǵý – kúnniń emes, bolashaqtyń jeńisi. Bul bastama arqyly jastardyń júregine senim uıalatý – men úshin úlken mártebe», dedi bilikti sportshy.
Almaty qalasy «Jastar Rýhy» tóraǵasy Dıdarbek Dildábek «Chempıondyq rýh» bul jaı ǵana sporttyq bastama emes, bul – jastardyń oı-sanasyn oıatýǵa, kúnin belsendilikpen bastaýǵa, tártip pen tabandylyqqa baýlýǵa baǵyttalǵan joba ekenin atap ótti.
Shahar jastary men memlekettik qyzmetshileriniń bir alańda jınalýy – bizdiń qoǵamda salaýatty ómir saltynyń shyn máninde qundylyqqa aınalyp kele jatqanyn kórsetedi. «Jastar Rýhy» aldaǵy ýaqytta da jastardyń fızıkalyq jáne rýhanı damýyna baǵyttalǵan osyndaı formattaǵy jobalardy turaqty túrde uıymdastyrýǵa yqylasty», dedi D.Dildábek.
Is-shara kóńildi áýenmen, sporttyq jattyǵýlarmen, qatysýshylarǵa arnalǵan belsendi oıyndarmen kómkerilip, chempıondardyń áserli áńgimelerine ulasty. Ashyq aspan astynda ótken bul is-shara jańa kúndi shabytpen bastaýdyń tamasha úlgisine aınalsa ıgi.