Bıylǵy 1 shildedegi jaǵdaı boıynsha erikti qonys aýdarý sheńberinde jumys kúshiniń utqyrlyǵyn arttyrý úshin jumys kúshi artyq óńirlerden jumys kúshi tapshy óńirlerge kóship kelgen 2 202 adamǵa, onyń ishinde 1 091 qandasqa jáne 1 111 qonys aýdarýshyǵa memlekettik qoldaý sharalary kórsetilgen. Jyl sońyna deıin 9 653 adamdy kóshirý josparlanyp otyr, dep habarlaıdy Egemen.kz.
Pavlodar oblysyna – 672 adam, Soltústik Qazaqstan oblysyna – 532 adam, Qostanaı oblysyna – 330 adam, Aqmola oblysyna – 215 adam, Shyǵys Qazaqstan oblysyna – 214 adam, Abaı oblysyna – 145 adam, Atyraý oblysyna – 90 adam, Ulytaý oblysyna – 4 adam qonys aýdarǵan.
Qonystaný aımaqtaryna kóshken qandastarymyz negizinen О́zbekstannan – 396 adam, Mońǵolııadan – 310 adam, QHR – 286 adam, Reseıden – 52 adam, basqa elderden – 47 adam kelgen.
Eńbekke qabiletti jastaǵy 790 adam ishinen turaqty jumys oryndaryna 374 adam jumysqa ornalastyrylǵan, 10 adam kásipkerlik qyzmetpen aınalysady.
Qonys aýdarýshylardyń biri Tamara Aınaddınovanyń ómirindegi oń ózgeristi atap ótti. Ol óziniń hımııa pániniń muǵalimi mamandyǵy boıynsha jańa turǵylyqty jerine kelgennen keıin jumysqa ornalasqan.
«Men Jambyl oblysynan Taıynsha aýdanyndaǵy Kellerovka aýylyna sonaý 2022 jyly kóship keldim. Qonys aýdarýǵa arnalǵan oblystyq kvotaǵa engizilgennen keıin kóship-qoný úshin qarjylaı kómek, sondaı-aq turǵyn úıdi jalǵa alý jáne kommýnaldyq qyzmetterge jumsalǵan shyǵyndardy óteý úshin sýbsıdııalar túrinde memlekettik qoldaýǵa ıe boldym.
Kóshýge sheshim qabyldaǵanymyzǵa, qonys aýdarýshylarǵa jumys taýyp berýge kómektesetin, alǵashqy qarjylyq kómek kórsetetin memleketten baǵdarlama baryna óte qýanyshtymyn. Men osy jerde otbasyn qurdym», deıdi T.Aınaddınova.
Eńbek jáne halyqty áleýmettik qorǵaý mınıstrligi erikti qonys aýdarý aıasynda qonys aýdarýshylarǵa memlekettik qoldaýdyń mynadaı sharalary usynylatynyn eske salady:
- otaǵasyna jáne otbasynyń árbir múshesine 70 AEK mólsherinde kóshýge arnalǵan bir rettik sýbsıdııa;
- otbasy músheleri sany men eldi mekenge baılanysty 15-ten 30 AEK-ke deıingi mólsherde 12 aı ishinde turǵyn úı jaldaýǵa jáne kommýnaldyq qyzmetterge aqy tóleýge aı saıynǵy sýbsıdııalaý;
- qysqa merzimdi kásiptik oqytýǵa joldama;
- jumysqa ornalasýǵa nemese kásipkerlik bastamany damytýǵa járdemdesý;
- ekonomıkalyq utqyrlyq sertıfıkattaryn berý.
Budan basqa, óńiraralyq qonys aýdarýǵa járdem kórsetetin jumys berýshilerge turǵyn úımen qamtamasyz etilgen jáne keminde 2 jyl merzimge turaqty jumysqa qabyldanǵan árbir qyzmetker úshin 400 AEK mólsherinde jumysqa ornalasýǵa birjolǵy sýbsıdııa beriledi.