Jobalyq quny – 1,5 mıllıard teńge, jyldyq qýaty – 14 myń tonna
Údemeli ındýstrııalyq-ınnovasııalyq damý jónindegi úılestirý keńesiniń qaraýyna ındýstrııalyq-ınnovasııalyq damý basqarmasynyń basshysy Marat Ysqaqov birneshe tyń jobalar usynyp, jumsalatyn ınvestısııalyq qarajat, qýattylyq, jumyspen qamtý kózderimen tanystyrdy. Sóz arasynda Indýstrııalandyrý kartasyna engiziletin 70 jobaǵa 100 mıllıard teńge mólsherinde qarjy baǵyttaý kózdelse, 29 jobanyń maquldanǵanyn aıta ketken jón.
Sonymen, úılestirý keńesiniń talqysyna túsken ozyq jobalarǵa kezek bereıik. «Paryz-2014» baıqaýynyń bas júldegeri Sermuhamed Oraluly kóp jyldan beri aǵash óńdeý isimen aınalysyp, tutynýshylarǵa ónimniń 40-tan astam túrlerin usynyp keledi. Aǵash óńdeý sehyna osy zamanǵy qural-jabdyqtar ornatqannan beri elimizdiń ózge óńirlerinen de suranystyń kóbeıe túskeni baıqalady. Básekelestikke tótep beretin sapaly taýarlar óndirýdiń qyr-syryn ábden meńgerip alǵannan keıin kópten bergi kókeıine túıip júrgen taǵy bir oıyn júzege asyrýdy nıet etken. Ol shıkizatty tereńdete ári qaldyqsyz óńdeý óndiris ornyn qurý ıdeıasy bolatyn. Onyń bul usynysyn keńes músheleri úlken qyzyǵýshylyqpen tyńdap, biraýyzdan qoldaý bildirdi.
Birinshiden, oblysta ekologııalyq taza ónim shyǵaratyn mundaı kásiporyn joq. Ekinshiden, kereksiz sanalyp kelgen aǵash jańqalary men butaqtary endi kádege jaratylady. Úshinshiden, aǵash qaldyqtarynan tasýǵa da, ótkizýge de yńǵaıly otyndyq brıket jasaý «jasyl ekonomıka» baǵdarlamasy talaptarymen yńǵaılas. Joba quny 92 mıllıon teńgeni quraıdy. Jylyna 120 myń tekshe metr ónim óndirýge qýatty, dedi óz sózinde isker kásipker. «Ahmýddınov» jeke kásipkerliginiń germanııalyq «Jensen» fırmasynan bıootyn brıketterin shyǵaratyn qondyrǵylar satyp alýǵa qarjylyq qoldaý jasaý jónindegi ótinishi qanaǵattandyryldy.
Oblysta jergilikti mańyzdaǵy joldar qalpyna keltirýdi qajet etedi. Máselen, 7530 shaqyrym avtomobıl joldarynyń jartysyna jýyǵy syn kótermeıdi. Sol sebepti bolar, usynylǵan jobalardyń ishindegi eń áleýettisi sanalatyn «InDorTeh» JShS iske qosýdy jobalap otyrǵan ınnovasııalyq materıaldar zaýytynyń qurylysy Indýstrııalandyrý kartasyna birden engizildi. Joba jetekshisi Anatolıı Tehnerıadnovtyń aıtýynsha, nysan paıdalanýǵa berilse, jóndeý jumystarynyń qunyn arzandatýǵa, paıdalaný merzimin 20 jylǵa deıin jetkizýge múmkindik týady.
Jol qurylysyna qajetti ınnovasııalyq materıaldar shyǵaratyn keshen ozyq tehnologııaǵa negizdelgen. Jylyna joldardyń oıqy-shoıqy jerlerin tegisteýge arnalǵan 45 tehnıka birligin, 14 myń tonna polımer-bıtým emýlsııasy men polımer-bıtým shaıyryn óndirip, 70 adamdy jumysqa ornalastyrýǵa qabiletti. Investısııa kólemi –1,5 mıllıard teńge. Buǵan qosa aldyńǵy qatarly sheteldik tájirıbelerdi keńinen qoldaný maqsatymen ǵylymı-óndiristik ortalyq qyzmeti engizilmek. Oblys ortalyǵynan 14 gektar jerdi paıdalaný quqyǵy resimdelgen. Jıynda ınjenerlik-kommýnıkasııalyq jeliler tartýǵa kómek beriletini, alǵashqy qadamdy Petropavl halyqaralyq áýejaıynyń ushý-qoný jolaǵyn qalpyna keltirýden bastaý qajettigi atap kórsetildi.
Búginde Qazaqstanda 180 myń tonna karton eksportqa shyǵarylady eken. Alaıda bul kólem áli jetkiliksiz kórinedi. Osy bir osal tusty atap kórsetken «Tore-Chıngızıd L.T.D» kompanııasynyń quryltaıshysy Igor Ovchınnıkov Smırnovo kentinde sabannan sellıýloza men karton óndiretin zaýyt salýǵa bel baılaǵanyn jetkizdi. Bul maqsat úshin aýdannyń tańdap alynýy kezdeısoq bolmasa kerek. Investısııa kólimi 650 mıllıon teńge, jyldyq qýaty 3500 tonna bolatyn kásiporynnyń aýyldyq jerde ornyǵýyn arzan shıkizat kózimen baılanystyrǵan jón sııaqty. Qazirgi ýaqytta jer telimin resimdeý, jańa nysandy qarjylandyrý oń sheshim tapqan. Endi «Bıznestiń jol kartasy-2020» baǵdarlamasy sheńberinde qosymsha qarjylandyrý ótinishi qanaǵattandyryldy.
Ozyq jobalardy ornalastyrý boıynsha ınvestorlar men qarjygerlerdiń eldi mekenderge de umtylys tanytýy quptarlyq. Máselen, Hamdı Ozkaraman jetekshilik etetin «ARBAT AS» JShS óz bıznesin Taıynsha aýdanynda damytqandy qolaıly kóretin tárizdi. О́ıtkeni, aýyldyq jerlerde sút óndirýmen aınalysatyn kásiporyndar óńirde joqtyń qasy. Kóbine sút ónimin jınap, tıisti oryndarǵa jetkizýmen ǵana shekteledi. Ol úshin burynǵy aýdan ortalyǵy Kellerovka aýylyndaǵy ámbebap dúkenniń ǵımaraty qalpyna keltirilip, Túrkııadan aldyrylǵan qural-jabdyqtar ornatylǵan. 106 mıllıon teńgeniń ındýstrııalyq jobasy jyl aıaǵyna deıin qoldanysqa berilse, 50 adam 120 tonna irimshik, súzbe, 240 tonna ıogýrt óndirýmen aınalysatyn bolady.
«Edınstvo» JShS-niń jylyna 40 myń sharshy metr turǵyn úı turǵyzýǵa paıdalanylatyn qańqa-paneldi, temir-beton buıymdaryn, «Ýnıversal» fırmasynyń asfalt-beton qospasyn shyǵarý jónindegi jobalar da maquldandy.
О́mir ESQALI,
«Egemen Qazaqstan».
Soltústik Qazaqstan oblysy.