Oral qalasynda Qazaqstannyń Halyq ártisi, Memlekettik syılyqtyń laýreaty, ánshi-kompozıtor Eskendir Hasanǵalıev ánderin oryndaýshylardyń HIII halyqaralyq «Atameken» án festıvali ótti.
Tanymal sazger atyndaǵy dástúrli festıvalǵa elimizdiń túkpir-túkpirinen jáne kórshiles elderden kelgen 26 úmitker qatysty. Olardyń ónerine kompozıtordyń jubaıy Darıko Hasanǵalıeva, Qazaqstannyń eńbek sińirgen qaıratkeri, áıgili ánshi-kompozıtordyń uly Birjan Hasanǵalıev, Qazaqstannyń Halyq ártisi, Memlekettik syılyqtyń laýreaty, ánshi-kompozıtor Altynbek Qorazbaev, О́zbekstannyń Halyq ártisi Mansýr Tashmatov, Qyrǵyzstannyń Halyq ártisi Salamathan Sadyqova, halyqaralyq, respýblıkalyq baıqaýlardyń laýreaty Marat Sarbópeev qazylyq etti.
Qazaq mýzyka óneriniń damýyna súbeli úles qosqan kompozıtordyń shyǵarmashylyǵy keńinen nasıhattalǵan óner saıysynda Almaty qalasynan kelgen ónerpaz Medet Orynbaev bas júldeni ıelendi.
Festıval qorytyndysynda birinshi oryn – aqtóbelik Mereı Samuratqa, ekinshi júlde – Astana qalasynan kelgen Parasat Otan men atyraýlyq Aıbar Ǵanıulyna, al úshinshi oryn – Oral qalasynyń namysyn qorǵaǵan Arýjan Bısembaıǵa, qyrǵyzstandyq Darıǵa Satarovaǵa jáne ózbekstandyq Sevara Týlanovaǵa buıyrdy.
Baıqaý barysynda baýyrlas úsh memlekettiń Halyq ártisteri Altynbek Qorazbaev, Salamathan Sadyqova jáne Mansýr Tashmatov te sahnada án shyrqady. Festıval «Atameken» óner ordasynyń túndigin jelpigen «Atameken» ánimen jabyldy. Elimizdiń beıresmı ánurany ispetti áýenge ánshilermen qatar qalyń kórermen qosyldy. Osynyń ózi Eskendirdiń ánderi halyqtyń júreginde ekenin kórsetti.
Batys Qazaqstan oblysy