El aýmaǵyna kirip, kóshi-qon zańdylyǵyn buzǵan qytaılyq azamattar shyǵarylatyn boldy. Belgili bolǵanyndaı, qytaılyq 38 adam Qazaqstanǵa «iskerlik» vızasymen «VSP» seriktestigine keńes berý qyzmetin kórsetý úshin kelipti. Alaıda, Atyraý qalasyna kelgennen keıin sheteldikter belgilengen zańǵa sáıkes ishki ister organyna ýaqytsha tirkelýge turmaǵan. Sóıtip, Qazaqstan Respýblıkasyna kelý zańdylyǵyn buzǵan Qytaı azamattaryna qatysty ákimshilik hattama toltyrylyp, sotqa joldanǵan bolatyn. Sot otyrysynyń nátıjesi boıynsha «Sotta Qytaı Halyq Respýblıkasynyń 38 azamaty ózderiniń kinálaryn tolyqtaı moıyndady. Endi olar mamandandyrylǵan ákimshilik sottyń qaýlysyna sáıkes 5 táýliktiń ishinde Qazaqstan Respýblıkasynyń aýmaǵynan shyǵyp ketýleri tıis», dep habarlady oblystyq sottyń baspasóz hatshysy Boranbaı Ǵalıev.
Joldasbek ShО́PEǴUL,
«Egemen Qazaqstan».
Atyraý oblysy.