«Almaty Business–2025» baǵdarlamasynyń oryndalý nátıjeleri týraly Almaty qalasynyń О́ńirlik kommýnıkasııalar qyzmetinde ótken brıfıng barysynda «Almaty Finance» JShS basqarma tóraǵasy Berik Qusaıynov málimdedi, dep jazady Egemen.kz.
«2025 jyly toǵyz aıda «Almaty Finance» jáne «Almaty» mıkroqarjy uıymy jalpy somasy 9,8 mlrd teńgege 70 jobany qarjylandyrdy. Bul 793 jańa jumys ornyn ashýǵa múmkindik berdi. Qoldaý óndiris pen qaıta óńdeý, densaýlyq saqtaý, bilim berý, áleýmettik kásipkerlik, kreatıvti ekonomıka, týrızm, sport jáne qyzmet kórsetý salalaryndaǵy kásipkerlerge kórsetildi», – dedi Berik Qusaıynov.
Baǵdarlama iske qosylǵan sátten bastap «Almaty» ÁKK-nyń enshiles jáne táýeldi kompanııalary 52,7 mlrd teńge somasyna 774 jobany qarjylandyryp, 6 168 jumys ornyn qurǵan. Ásirese, óndiris jáne qaıta óńdeý (32%), densaýlyq saqtaý (14%), áleýmettik kásipkerlik (9%), týrızm (7%), kreatıvti ındýstrııa (7%), qyzmet kórsetý salasy (6%) jáne bilim berý (5%) salalaryndaǵy jobalarǵa qomaqty qarjy bólingen. Baǵdarlama aıasynda 18 shaǵyn ónerkásiptik park qurylysy qarjylandyrylypty.
Qusaıynovtyń aıtýynsha, Bostandyq jáne Alataý aýdandary qarjylandyrylǵan jobalar sany boıynsha kósh bastap tur.
Aıta keteıik, Almaty Business-2025 baǵdarlamasyn 2019 jyly Almaty qalasynyń máslıhaty bekitken edi. Baǵdarlama kásipkerlikti damytýǵa jáne bıznesti qarjylandyrýdyń qoljetimdiligin arttyrýǵa baǵyttalǵan. Ony iske asyrý úshin «Almaty Finance» JShS jáne «Almaty» MQU enshiles kompanııasy quryldy, olar «Almaty» ÁKK kompanııalar tobyna kirdi.
Baǵdarlama boıynsha shaǵyn jáne orta bızneske jeńildetilgen nesıe berý qarastyrylǵan. Nesıe 7 jylǵa deıingi merzimge jyldyq 2% jáne 6% mólsherlememen beriledi. 2% mólsherleme kópbalaly az qamtylǵan otbasylarǵa, I jáne II toptaǵy múgedekterge, erekshe qajettiligi bar balalardy tárbıelep otyrǵan otbasylarǵa, sondaı-aq, shaǵyn ónerkásip parkteriniń rezıdentterine usynylady.
6% mólsherleme Almatydaǵy shaǵyn jáne orta bıznestiń jumys istep turǵan jáne nemese isin endi bastaǵan sýbektilerge beriledi.