Qazaqstan Respýblıkasy Kásipodaqtar federasııasy – eldegi eń iri eńbekshiler birlestigi retinde eńbekkerlerdiń áleýmettik-ekonomıkalyq quqyqtary men múddelerin belsendi túrde qorǵap keledi. Sondaı-aq Qazaqstan Respýblıkasynyń Halyqaralyq eńbek uıymynyń №131 «Damýshy elderdi eskere otyryp, eń tómengi jalaqyny belgileý týraly» konvensııasyn ratıfıkasııalaýyn quptaıdy, dep jazady Egemen.kz.
Bul – Qazaqstandy laıyqty eńbek pen ádil eńbekaqyǵa qatysty halyqaralyq standarttarǵa jaqyndatatyn tarıhı sheshim.
Qazaqstan Respýblıkasynyń Prezıdenti Qasym-Jomart Toqaevtyń tıisti Zańǵa qol qoıýy – eldegi eńbekkerlerdiń laıyqty ómir súrý deńgeıin qamtamasyz etý men áleýmettik ádilettilikti nyǵaıtý jolyndaǵy mańyzdy qadamdardyń biri.
№131 Konvensııany ratıfıkasııalaý – jaı ǵana resmı akt emes, ol Qazaqstannyń áleýmettik saıasatynyń damýyndaǵy mańyzdy beles, eńbekke jáne eńbek adamyn qurmetteýdiń kórinisi.
Halyqaralyq eńbek uıymy №131 Konvensııany laıyqty eńbektiń tórt tireginiń biri retinde qarastyrady (eńbek quqyqtary, qaýipsizdik jáne áleýmettik qorǵaýdy qosa alǵanda). Bul qujat SDG 8: «Laıyqty eńbek jáne ekonomıkalyq ósý» atty Turaqty damý maqsatyna , sonyń ishinde 8.5-mindetke – 2030 jylǵa deıin barlyq áıelder men erler úshin tolyq jáne ónimdi jumyspen qamtylý men laıyqty eńbekaqyny qamtamasyz etýge baǵyttalǵan.
Konvensııada eń tómengi jalaqyny anyqtaý kezinde tek ekonomıkalyq faktorlar ǵana emes, sonymen qatar jumysshylar men olardyń otbasylarynyń qajettilikteri, baǵa deńgeıi, járdemaqylar, áleýmettik qorǵaý jáne kásipodaqtardyń sheshim qabyldaý úderisine qatysýy eskerilýi tıis ekeni jazylǵan.
Kásipodaqtar federasııasy osy Konvensııanyń ratıfıkasııalanýy úshin kóp jyldan beri eńbek etip keledi. Biz bul oqıǵany búkil eńbek qaýymdastyǵynyń jeńisi jáne ulttyq baılyqty jasaıtyn adamdarǵa degen qurmet belgisi dep baǵalaımyz.
Kásipodaqtar federasııasynyń pikirinshe, №131 Konvensııanyń erejelerin iske asyrý Qazaqstanǵa eń tómengi jalaqyny belgileýdiń neǵurlym ádil jáne ashyq júıesine kóshýge múmkindik beredi. Bul júıe makroekonomıkalyq kórsetkishterge ǵana emes, eń aldymen eńbek adamdarynyń naqty ómirlik qajettilikterine súıenýi kerek.
Kásipodaqtar federasııasy Konvensııany is júzinde júzege asyrý barysynda mynadaı qaǵıdattardyń qamtylýyna qol jetkizýdi kózdeıdi:
eńbekkerlerdiń laıyqty eńbekaqy alýyna kepildikterdi kúsheıtýge yqpal etedi; áleýmettik-ekonomıkalyq faktorlardy eskere otyryp, eń tómengi jalaqyny retteý júıesiniń tıimdiligin arttyrýdy qamtamasyz etedi; Qazaqstannyń áleýmettik ádildik qaǵıdattaryna jáne halyqaralyq eńbek standarttaryna berik memleket retindegi halyqaralyq ımıdjin nyǵaıtady; Halyqaralyq eńbek uıymymen jáne BUU-nyń Turaqty damý maqsattarymen kelisilgen laıyqty eńbek kún tártibin iske asyrý jolyndaǵy mańyzdy qadam bolady.Kásipodaqtar federasııasy Konvensııa erejelerin ulttyq zańnama men ujymdyq-sharttyq qatynastarda tıimdi iske asyrý úshin úshjaqty áriptestik aıasynda belsendi jumys isteýge daıyn.