Kókshetaý qalasynyń turǵyny Dinbolat Qusaıynov anasynyń ómirin saqtap qalý úshin baýyryn donor retinde berdi. Bul sheshimge ol alty jyl buryn bekigenimen, anasynyń kelisimin uzaq kútýge týra kelgen, dep jazady Egemen.kz.
Meńdigúl Latıf – joǵary sanatty hırýrg-anestezıolog, 33 jyldyq eńbek ótili bar tájirıbeli maman. Almaty qalasy men Soltústik Qazaqstan óńirindegi aýrýhanalarda júzdegen ota jasap, talaı adamnyń ómirin arashalap qalǵan. Qazir Aqmola oblystyq kópbeıindi aýrýhana janyndaǵy onkodıspanserdiń hımıoterapııa bólimin basqarady. Kún saıynǵy tynymsyz jumystyń ortasynda ol juqpaly vırýsty baıqaýsyzda juqtyryp alǵan: bálkim qan arqyly, bálkim qolǵap arqyly naýqastan berilgen bolýy múmkin.
«V jáne D gepatıti baýyrdy zaqymdaǵan eken. Buǵan deıin bilmedim. 2019 jyly jubaıymnan búırek obyry anyqtalǵanda qatty kúızeldim, kóp jyladym. Sol kezde aýyrsyný bastalyp, tekserýden ótkende – sırroz degen dıagnoz qoıyldy. Sodan beri alty jyl boıy aýrýmen kúrestim», deıdi ol.
Anasynyń jaǵdaıyn estigen Dinbolat qatty qınalǵan.
«Júregim ezilip, kóz jasym tyıylmady. Qalaı ómir súremin degen oı mazalady. Alǵashynda dárigerler marqum donordan alynǵan baýyr qajet dedi. Biraq mundaı kezekke Qazaqstanda tórt myńǵa jýyq adam tirkelgen. Anamnyń jaǵdaıy kún saıyn nasharlap bara jatqan soń, ózim donor bolatynymdy aıttym», deıdi ol.
Dinbolattyń taldaýlary donorlyqqa tolyq sáıkes kelgen. Alaıda ana júregi birden kelise qoımaǵan.
«Ol – meniń jalǵyz ulym. 2019 jyly sport sheberi ataǵyn alyp jatqan kezi edi. Onyń ómirine qaýip tóndire almaıyn dep oıladym. Balamnan baýyr alý týraly oıdyń ózi qorqynyshty boldy», deıdi Meńdigúl Saýythanqyzy.
Sońǵy eki jylda dárigerdiń jaǵdaıy kúrt nasharlaǵan. «О́mirim qyl ústinde turdy. Ulym, qyzym, nemerem kúndiz-túni jylap júrdi. Tek bir tileýim – 80 jastaǵy anam meniń qınalǵanymdy kórmese eken», deıdi ol.
Qan ketý bastalǵan sátte Dinbolat sheshim qabyldaýdy kútkizbedi. «Mama, kettik. Biz endi donor kútip otyrmaımyz», degende, anasy táýekel etýge bel býǵan. «О́lsem, buıyrǵany sol shyǵar. Balalarym ókinbesin dedim. Ulymnyń kózindegi jas bárin sheshti», deıdi ol.
Bul Meńdigúl Latıftiń ómirindegi toǵyzynshy ári eń aýyr operasııa boldy. Ulynyń baýyrynan úlgi alý 6,5 saǵatqa, anasyna transplantasııa jasaý 9,5 saǵatqa sozylǵan.
«Oıanǵan sátte janymda eshkim bolmady. Eń aldymen ulymdy izdedim. Ol – meniń jalǵyz tiregim. Qol-aıaǵym dirildep ketti. Reanımasııada ótken segiz kún tek sony kútýmen ótti. Palataǵa aýystyrǵan soń baryp kóristik. Bul sátti sózben jetkizý qıyn. Ekeýmiz uzaq qushaqtasyp turdyq. «Mama, sen tirisiń be?» dep te suramady, men de jaýap bermedim. Tek únsiz qushaqtastyq», dep eske alady ol.
Búginde anasyna ekinshi ómir syılaǵan Dinbolat sport mektebinde jattyqtyrýshy bolyp jumys isteıdi. О́ziniń otbasy, balalary bar. Ákesi – medısına qyzmetkeri, al ápkesi Mońǵolııada dáriger. Meńdigúl Latıf syrqattan aıyqqan soń onkodıspanserde emdeý jumysyn qaıta jalǵastyrǵan.