Premer-mınıstrdiń orynbasary – Mádenıet jáne aqparat mınıstri Aıda Balaeva óziniń Facebook paraqshasynda el tarıhynda tuńǵysh ret «Gremmı» júldesin alǵan mýzykant Imanbek Zeıkenov «Qurmet» ordenimen marapattalǵanyn jazdy, dep habarlaıdy Egemen.kz.
Bul marapat Memleket basshysynyń Jarlyǵymen Respýblıka kúnine oraı eldiń ekonomıkalyq jáne qoǵamdyq ómiriniń túrli salalaryn damytýǵa eleýli úles qosqan birqatar azamatqa berildi.
Aıta keteıik, keıbir azamattar marapat tabystalar sátte el aýmaǵynda bolmaǵannan keıin, nagradalaryn ýaqytyly ala almady.
– «Qurmet» ordenimen Konfessııaaralyq jáne dinaralyq dıalogtyń halyqaralyq ortalyǵy janyndaǵy Sezdiń bastamalaryn iske asyrý departamentiniń burynǵy basshysy Qarlyǵash Qalılahanova jáne «Gremmı» júldesin alǵan tuńǵysh qazaqstandyq mýzykant Imanbek Zeıkenov marapattaldy, – dedi mınıstr.
Buǵan deıin akter, kaskadıor jáne kásibı aralas jekpe-jek sheberi Erkebulan Toqtardyń «Qazaqstannyń eńbek sińirgen qaıratkeri» ataǵyna ıe bolǵanyn jazǵan edik.