Eki el arasyndaǵy qarym-qatynastardyń mańyzdy baǵyttarynyń biri – ekonomıkalyq yntymaqtastyq. Japonııa Qazaqstan ekonomıkasyndaǵy iri sheteldik ınvestorlardyń qataryna kiredi. Jınalǵan tikeleı ınvestısııalardyń jalpy kólemi shamamen 8,5 mlrd dollardy quraıdy, dep jazady Egemen.kz.
Japonııa Azııa damý bankiniń (ADB) jáne Eýropalyq qaıta qurý jáne damý bankiniń (EQDB) eń iri aksıonerleriniń biri retinde olardyń postkeńestik respýblıkalardaǵy qyzmetin keńeıtýge yqpal etti. ADB úshin Qazaqstannyń 1994 jyly bankke qosylýy kezinde tehnıkalyq kómekti qarjylandyrsa, EQDB úshin yntymaqtastyqtyń arnaıy qoryn quryp, saraptamalyq qoldaý men qajetti zańnamalyq bazany daıyndaýǵa járdemdesti. Bul Ortalyq Azııanyń jahandyq qarjy júıesine ıntegrasııalanýyna, naryqtyq ekonomıkanyń nyǵaıýyna jáne Qazaqstannyń óńirlik táýeldiliginiń tómendeýine yqpal etti.
Japonııanyń Qazaqstanǵa senimi joǵary
Ulttyq banktiń derekterine sáıkes, 2024 jyldyń qorytyndysy boıynsha Japonııadan Qazaqstanǵa tikeleı sheteldik ınvestısııalar aǵyny 468,6 mln dollarǵa jetken (+16%). Bul kórsetkishter japon bıznesiniń eldiń ekonomıkalyq saıasatyna jáne ınvestısııalyq ahýalyna degen joǵary senimin aıqyn kórsetedi.
Oń serpin ózara saýda-sattyqta da baıqalady
2024 jyldyń qorytyndysy boıynsha Qazaqstan men Japonııa arasyndaǵy taýar aınalymy shamamen 1,8 mlrd dollardy quraǵan. Al 2025 jyldyń 10 aıynda bul kórsetkish 1,4 mlrd dollarǵa jýyqtaǵan.
Elimizde 70 japon kompanııasy bar
Qazaqstanda Sumitomo, Marubeni, Toshiba, Mitsui jáne basqa da kompanııalardy qosa alǵanda, shamamen 70 japon kompanııasy tabysty jumys istep jatyr. Japon tarapy taý-ken metallýrgııasy salasyndaǵy, energetıkadaǵy, sondaı-aq tranzıttik-kólik salasyndaǵy iri jobalardy iske asyrýǵa belsendi qatysyp keledi.
Marubeni kompanııasy
Japonııa naryǵynda Marubeni kompanııasy saýda, ınvestısııa, mıneraldyq resýrstardy óndirý men óńdeý, sondaı-aq ınfraqurylymdy damytý salalarynda kóshbasshy bolyp sanalady. Qazaqstanda bul kompanııa Atyraý munaı óńdeý zaýytyn jáne Astana qalasynyń halyqaralyq áýejaıyn qaıta jańǵyrtý jobalaryna qatysty. «Qazatomónerkásip» UAK» AQ-men birlesip, Horasan ýran ken ornyn ıgerý jáne Qyzylorda oblysynda kúkirt qyshqyly zaýytyn salý jumystary júrgizilip jatyr. Sonymen qatar, Marubeni Qazaqstanda dekarbonızasııa jáne kómirqyshqyl gazy shyǵaryndylaryn azaıtý salalaryndaǵy jobalardy iske asyrý múmkindikterin zerttep jatyr.