«Astana Opera» tórinde «we are the world» halyqaralyq balalar sýret kórmesi ashyldy. Elordalyq teatr bul kórmeni bıyl ekinshi ret ótkizip otyr.
Kórme naǵyz shyǵarmashylyq merekege aınalyp, «Astana Opera» teatrlyq qolóner stýdııasynyń tárbıelenýshilerin, sondaı-aq elimizdiń jáne álemniń túkpir-túkpirinen daryndy balalardy teatr kúmbeziniń astyna jınady. Aıta keteıik, «we are the world» jobasy – 2018 jyldan beri 60 eldiń jas sýretshilerin biriktirip kele jatqan jahandyq bastama. Atalǵan joba jas talanttarǵa Parıjdegi Lývr men Londondaǵy «White Cube» galereıasynan bastap Máskeýdegi Ǵarysh mýzeıine deıingi bedeldi alańdarda óz jumystaryn usynýǵa múmkindik beredi.
Bıyl kórme úılestirýshisi Irına Kýsenova qatysýshylarǵa erekshe ári ǵajaıyp teatr taqyrybyn usyndy. Bul oı balalardy odan saıyn shabyttandyryp, P.I.Chaıkovskııdiń «Shelkýnchık» kórsetilimderi qarsańynda dál osy batyl ertegi keıipkeri kóptegen jumystyń negizgi beınesine aınaldy. Jas sýretshilerdiń qalamyndaǵy aǵash sarbazdar, periler, tyshqan patshalary men jarqyraǵan shyrshalar zaldy ǵajaıyp kúıge toltyrdy. Sondaı-aq K.Baıseıitova atyndaǵy Kameralyq zalda «Astana Opera» balalar teatr stýdııasy daıyndaǵan mazmundy konsert ótti.
«Osyndaı sahnada óz jumystaryn usynyp, dıplom alý – jas qatysýshylar úshin zor jetistik. Biz Astanadaǵy ǵana emes, búkil Qazaqstandaǵy art-mekteptermen jáne stýdııalarmen uzaq jyldan beri jumys istep kelemiz. Bizdiń balalarymyz búkil álem boıynsha, atap aıtqanda, London, Parıj, Los-Andjeles, Beıjiń qalalarynda ótetin kórmelerge qatysyp júr. Ár eldiń óz kórkemdik mektebi bar, bul erekshelik jumystardan aıqyn kórinedi. Qazaq balalarynyń sýretterinen ashyqtyq, jasampazdyq jáne týǵan eline degen súıispenshilik erekshe baıqalady», deıdi «We Are the World» halyqaralyq mádenı dıplomatııa qaýymdastyǵynyń prezıdenti Stefanı Gaspar.
Uıymdastyrýshylar atap ótkendeı, «we are the world» – mádenıetaralyq baılanystardy damytýǵa, balalarǵa ózderin kórsetýge kómektesýge jáne óz kúshterine degen senimdilikti qalyptastyrýǵa baǵyttalǵan aýqymdy joba. 2018 jyldan beri álemniń 60-tan astam elinen balalardyń qatysýymen 30-dan astam is-shara ótkizildi.
Al kelesi kórmeler Taıland, Sıngapýr men Italııada ótedi dep josparlansa, 2026 jyly jeltoqsanda jas sýretshiler Parıjde (Fransııa) qaıta kezdesedi.