Sherhan Murtaza atyndaǵy Taraz ýnıversıteti men «Aýyl» partııasynyń uıytqy bolýymen voleıboldy otyryp oınaýdan el chempıonaty ótti. Taraz tórinde alǵash ret uıymdastyrylǵan dodaǵa elimizdiń ár qıyrynan 6 komanda qatysyp, ózara kim myqtyny anyqtady.
«Múmkindigi shekteýli sportshylardy qoldaý, para sportty órkendetý maqsatynda bizdiń ýnıversıtet voleıboldy otyryp oınaý sportyn damytýǵa qoldan kelgenshe qoldaý kórsetip júr. Dodaǵa Astana, Almaty qalalary men Jetisý, Batys Qazaqstan oblysy sekildi birneshe óńirden komandalar qatysty. Aldaǵy ýaqytta da múmkindigi shekteýli, qabileti sheksiz azamattarǵa qoldaý kórsetý jumysy toqtamaıdy», deıdi ýnıversıtet rektory Mahmetǵalı Sarybekov.
El chempıonatynda topqa túsken komandalardyń barlyǵy jeńistiń bıik tuǵyrynan kórinýge tyrysty. Múmkindigi shekteýli demeseńiz, olardyń jankeshtiligi kásibı sportshylardan esh kem túspeıtini baıqaldy. Árbir nátıjeli upaıǵa shynaıy qýanǵan olardyń júzinen shattyq taby aıqyn kórinip turdy.
Chempıonat qorytyndysynda Almaty oblysynyń qyzdary jeńistiń eń bıik tuǵyrynan kórinse, ekinshi oryn Almaty qalasynyń arýlaryna buıyrdy. Astanadan kelgen qyzdar úzdik úshtikti túıindedi. Jarysqa qatysqan barlyq komanda qomaqty qarjylaı syılyqqa ıe boldy.
M.Sarybekovtiń aıtýynsha, sporttyń osy túrin damytýǵa qatysty aldaǵy ýaqytta da aýqymdy jumys atqarylady. Ýnıversıtet basshylyǵy para sportshylardy qoldaýǵa aıryqsha basymdyq berip otyr.
TARAZ