Elordada kólik pen logıstıka salasyndaǵy Eýrazııalyq bedeldi marapat sanalatyn «Magistral Awards – 2025» premııasynyń jeńimpazdary anyqtaldy. Kásibı orta bul syılyqty kópten beri «transporttyq Oskar» dep atap keledi, dep habarlaıdy Egemen.kz.
Bıylǵy marapattaý rásimi kólik jáne logıstıka salasynyń aýqymy keńeıip, mańyzy artqanyn taǵy bir márte kórsetti. Uıymdastyrý komıtetiniń málimetinshe, 2025 jyly baıqaýǵa 100-den astam ótinim túsken. Oǵan TMD elderi, EAEO memleketteri, Qytaı, Birikken Arab Ámirlikteri jáne basqa da elderdiń kompanııalary men sarapshylary qatysqan.
Jeńimpazdar 21 nomınasııa boıynsha anyqtaldy. Olardyń qatarynda ınfraqurylym, sıfrlandyrý, kadr daıarlaý, qoǵamdyq bastamalar jáne salanyń turaqty damýyna baǵyttalǵan jobalar bar. Bul premııanyń tek tehnologııa men bızneske ǵana emes, adam kapıtaly men áleýmettik jaýapkershilikke de mán beretinin kórsetedi.
Magistral Awards premııasy Kólik mınıstrliginiń, «Qazaqstan temir joly» ulttyq kompanııasynyń, «KAZLOGISTICS» kólik odaǵynyń jáne N. Isıngarın atyndaǵy kólik bastamalaryn qoldaý qorynyń uıymdastyrýymen ótti.
Saltanatty jıynda Eýrazııalyq ekonomıkalyq komıssııanyń quttyqtaý sózi oqyldy. Onda kólik pen logıstıka búginde aımaq elderi ekonomıkasyndaǵy strategııalyq resýrsqa aınalyp otyrǵany aıtyldy. Qazirgi kezde jańa baǵyttar qalyptasyp, sıfrlyq sheshimder engizilip, ulttyq strategııalar ózara úılestirilip jatqanyn atap ótti. Munyń bári birtutas eýrazııalyq keńistik qurýǵa jol ashyp otyr degen oı aıtyldy.
Marapattaý barysynda Qazaqstannyń kólik salasyna jaýapty ókilderi men qoǵam qaıratkerleri de sóz sóıledi. Olardyń qatarynda Kólik vıse-mınıstri Jánibek Taıjanov, Senat depýtaty Evgenıı Bolgert, Májilis depýtaty Murat Ábenov, «Qazaqstan temir joly» kompanııasy basqarma tóraǵasynyń orynbasary Marat Shákenov, BUU Ǵalamdyq kommýnıkasııalar departamentiniń ókili jáne BUU Qazaqstandaǵy aqparat bıýrosynyń basshysy Vlastımıl Samek boldy.
Salanyń damýyna úles qosyp júrgen spıkerler kólik ınfraqurylymynyń ekonomıka men óńiraralyq baılanystardaǵy rólin atap ótti. Sonymen qatar kólik dálizderiniń qaýipsizdigi, sıfrlandyrý jáne halyqaralyq áriptestiktiń mańyzyna erekshe toqtaldy.
Premııanyń bastamashysy ári TLK Media kompanııasynyń bas dırektory Janna Isıngarına jobanyń keıingi 4 jylda úlken joldan ótkenin aıtty. Onyń sózinshe, alǵashqy kezde bul bastama ulttyq deńgeıde bastalǵanymen, búginde halyqaralyq kásibı moıyndaý alańyna aınalǵan.
«Bul joba alǵash qurylǵanda biz salalyq qaýymdastyqty biriktirýdi maqsat ettik. Búgin premııa shekara asyp, halyqaralyq deńgeıde moıyndalǵan kásibı platformaǵa aınaldy. Bul kólik pen logıstıka salasynda eńbek etip júrgen myńdaǵan mamannyń eńbegine berilgen baǵa dep bilemin», dedi ol.
2025 jyly premııanyń mazmundyq baǵyty da keńeıe tústi. Dástúrli salalyq jetistiktermen qatar ekologııalyq jaýapkershilik, urpaqtar sabaqtastyǵy jáne jastar bastamalaryna aıryqsha nazar aýdaryldy. Uıymdastyrýshylar bul baǵyttardy Eýrazııadaǵy kólik júıesiniń turaqty damýy úshin mańyzdy faktorlar dep atap ótti.