Batys Qazaqstan oblysynyń Aqsaı qalasynda jańa mektep paıdalanýǵa berildi, dep habarlaıdy Egemen.kz.
Batys Qazaqstan oblysynyń Bórli aýdanyna qarasty Aqsaı qalasynda №1 jalpy orta bilim beretin mekteptiń jańa ǵımaraty paıdalanýǵa berildi. Nysan «Keleshek mektepteri» jobasy aıasynda salyndy.
Mekteptiń ashylý saltanatynda sóılegen sózinde Batys Qazaqstan oblysynyń ákimi Narıman Tóreǵalıev Memleket basshysy Qasym-Jomart Toqaev bilim berý salasyn damytýǵa erekshe mán berip otyrǵanyn atap ótti.
«Bilimdi ári sanaly urpaq tárbıeleý – asa mańyzdy memlekettik mindet. «Keleshek mektepteri» jobasy – óskeleń urpaqqa jasalyp otyrǵan naqty ári júıeli qoldaý. Bul mektep jańa dáýirge laıyq, básekege qabiletti tulǵalardy tárbıeleýge qyzmet etedi», dedi óńir basshysy.
Aqsaı qalasynda 58 myńǵa jýyq turǵyn bar. Buǵan deıin №1 mektep 1953 jyly salynǵan, jobalyq qýaty 450 orynǵa eseptelgen eski ǵımaratta ornalasyp, apatty jaǵdaıda bolǵan edi. Jańa mekteptiń iske qosylýy qaladaǵy apatty bilim berý nysany máselesin sheshýge múmkindik berdi.
Jańa ǵımarat 300 orynǵa eseptelgen. Mektep eki qabatty, jeti bloktan turady. Onyń úsh blogy bastaýysh synyptar men mektepaldy daıarlyq toptaryna arnalǵan. Dene shynyqtyrý-saýyqtyrý nysandary jeke blokta ornalasqan. Ekinshi qabatta kitaphana, 110 oryndyq akt zaly, horeografııa zaly, STEM zerthanasy, IT synyp, muǵalimder bólmesi jáne birneshe kovorkıng aımaǵy qarastyrylǵan.
Mektepte barlyǵy 28 oqý kabıneti bar, olar ınteraktıvti taqtamen jabdyqtalǵan. Sonymen qatar, beıneleý óneri, grafıka jáne jobalaý, dızaın jáne tehnologııa, tamaqtaný mádenıeti, úı mádenıeti kabınetteri, eki ınformatıka kabıneti jáne 110 oryndyq ashana jumys isteıdi.
Mektep aýmaǵy abattandyrylyp, balalarǵa arnalǵan oıyn alańy, fýtbol jáne basketbol alańdary, júgirý joldary salynǵan.
Jańa mektep Aqsaı qalasyndaǵy oqýshylardy qaýipsiz ári zamanaýı oqý ornymen qamtamasyz etip, óńirdegi bilim berý sapasyn arttyrýǵa baǵyttalǵan mańyzdy áleýmettik nysanǵa aınaldy.