Elimizde jeke jattyǵýǵa arnalǵan ıntellektýaldy sporttyq koýchıng baǵdarlamasy ázirlenip jatyr. Jasandy ıntellekt pen kompıýterlik kórý tehnologııasyna negizdelgen jobany Q.Jubanov atyndaǵy Aqtóbe óńirlik ýnıversıteti júzege asyryp otyr, dep jazady Egemen.kz.
Atalǵan baǵdarlama sportshylar men áýesqoı paıdalanýshylardyń qozǵalys tehnıkasyn avtomatty túrde taldap, jeke fızıkalyq kórsetkishterine sáıkes jattyǵý usynymdaryn qalyptastyrýǵa múmkindik beredi. Jasandy ıntellekt algorıtmderi arqyly qozǵalystaǵy qatelikter anyqtalyp, jattyǵý prosesiniń tıimdiligi artady.
Jobanyń ǵylymı jetekshisi – ınformatıka jáne aqparattyq tehnologııalar kafedrasynyń dosenti, PhD Ádiljan Kereev. Onyń aıtýynsha, bul joba ǵylym men praktıkanyń toǵysqan naqty nátıjesi.
«Jasandy ıntellekt negizindegi bul baǵdarlama sporttaǵy jeke daıyndyqty jańa deńgeıge kóterýge múmkindik beredi. Eń mańyzdysy – stýdentter naqty óndiristik tapsyrmalardy sheshý arqyly zamanaýı tehnologııalardy tájirıbede meńgerip jatyr. Joba «Iron-BARS» jaýapkershiligi shekteýli seriktestiginiń tapsyrysymen ázirlenip otyr», deıdi joba jetekshisi.
Jobany iske asyrýǵa «Esepteý tehnıkasy jáne baǵdarlamalyq qamtamasyz etý» bilim berý baǵdarlamasynyń stýdentteri Erlan Aımuqanov pen Kırıll Pılıpenko qatysyp jatyr. Kırıll Pılıpenkonyń aıtýynsha baǵdarlamanyń qoldaný aıasy keń.
«Júıe kásibı sportshylarǵa da, sportpen áýesqoı túrde aınalysatyn adamdarǵa da beıimdele alady. Baǵdarlama paıdalanýshynyń deńgeıine qaraı jeke usynym beredi», deıdi stýdent.
Al oryndaýshy Erlan Aımuqanov: «Baǵdarlama kompıýterlik kórý tehnologııasy arqyly adamnyń qozǵalysyn naqty ýaqyt rejıminde tanýǵa negizdelgen. Bul joba bizge mashınalyq oqytý men derekterdi taldaý ádisterin praktıkada qoldanýǵa múmkindik beredi. Jasandy ıntellekt jattyǵý sapasyn arttyrýǵa naqty úles qosa alady», deıdi.
Memleket basshysy Qasym-Jomart Toqaev jasandy ıntellektini ǵylym men ınnovasııany damytýdyń negizgi tetigi bolý qajet ekenin atap ótken edi. Prezıdenttiń aıtýynsha, jasandy ıntellekt salasyndaǵy ǵylymı zertteýler men kadr daıarlaý – el damýynyń strategııalyq baǵyty.
Osy turǵydan alǵanda, Q.Jubanov atyndaǵy Aqtóbe óńirlik ýnıversıtetinde júzege asyrylyp jatqan bul joba elimizdegi qoldanbaly jasandy ıntellekt zertteýlerin damytýǵa, jas ǵalymdar men stýdentterdiń ǵylymı áleýetin arttyrýǵa baǵyttalǵan mańyzdy bastamalardyń biri.