Jambyl oblysy IID uıymdasqan qylmysqa qarsy kúres basqarmasynyń qyzmetkerleri qolyna jol sómke ustaǵan Qyrǵyz Respýblıkasynyń turǵynyn tekserý barysynda, odan Kalashnıkov avtomatyn, Makarov tapanshasyn, magazıni men uńǵysyna dybys tunshyqtyrǵysh ornatylǵan PSN tapanshasyn, ártúrli kalıbrli 55 oq dárilerin tárkiledi.
Jedel is-shara IID bastyǵy, polısııa polkovnıgi Beket Aımaǵambetovtyń jeke qadaǵalaýymen ótkizildi. О́ıtkeni, atys qarýlaryn alyp ótpek bolǵan kúdiktini tutqyndaý boıynsha arnaıy operasııa eki aptaǵa sozyldy. Asa qyraǵylyqty talap etetin osy jaýapty kúnderi jambyldyq polıseıler QR UQK 2035 áskerı bóliminiń shekarashylarymen birge shekara buzýshy ótýi múmkin aımaqty birlesip kúzetken. Aqyry Merki aýdanyndaǵy Granıtogorsk beketi mańyndaǵy sý bógetinen ótpekshi bolǵan Qyrǵyz Respýblıkasy Shý oblysynyń turǵyny qolǵa tústi. Shekara buzýshynyń aıtýynsha, Aleksandrovka aýylynyń belgisiz eki azamaty oǵan qarýy bar sómkeni bes myń somǵa (shamamen 15 myń teńge) ótkizip berýdi ótingen.
Qazirgi tańda 63 jastaǵy kúdikti qamaýda otyr. Ol tıisinshe qarýdy zańsyz satyp alǵany, saqtaǵany, tasymaldaǵany nemese qarýdy alyp júrgeni jáne ony kedendik shekaradan ótkizgeni úshin QR QK 250 jáne 251-baptary boıynsha bes jylǵa deıin bas bostandyǵynan aıyrylmaq.
Kósemáli SÁTTIBAIULY, Jambyl oblysy.