Aldaǵy qysqy Olımpıada qarsańynda Qazaqstandaǵy qysqy sport túrleriniń jaı-kúıi nazarǵa ilikti. Italııanyń Mılan jáne Kortına-d’Ampesso qalalarynda bastalatyn XXV qysqy Olımpııa oıyndaryna elimizden 36 sportshy attanyp, 13 sport túri boıynsha baq synamaq. Tórt jyl ishinde olardyń daıyndyǵyna bıýdjetten 13,3 mlrd teńgeden astam qarajat jumsaldy. Bul qarjynyń naqty qaıtarymy aqpan aıynyń sońynda belgili bolady. Al ázirge resmı statıstıkaǵa súıenip, eldegi qysqy sporttyń jalpy damý baǵytyna kóz júgirttik, dep saraptaıdy Egemen.kz.
XXV qysqy Olımpııa oıyndary qarsańynda jarııalanǵan Týrızm jáne sport mınıstrligi derekteri 2022 jyldan bergi úsh jylda qysqy sportpen júıeli túrde shuǵyldanatyn otandastarymyzdyń jalpy sany aıtarlyqtaı ózgermegenin kórsetedi. Olımpıadalyq 13 jáne bir olımpıadalyq emes qysqy sport túrine qatysýshylar sany 158,4 myń adam deńgeıinde qalǵan. О́sim nebári 1,2 paıyz. Bul jańa sportshylardyń jappaı kelýinen góri, bir sport túrinen ekinshisine aýysý úrdisin ańǵartady.
Sandyq qurylym eki negizgi tendensııany aıqyndaıdy. Birinshisi – shańǵy men snoýbordqa baılanysty sport túrlerindegi aıqyn tómendeý. Úsh jyl ishinde shańǵy sporty men snoýbordıng seksııalarynan 9,5 myń adam ketken. Soǵan qaramastan, shańǵy jarysy qysqy sportpen shuǵyldanýshylardyń shamamen 46 paıyzyn qamtyp otyr. Teris dınamıkadan bıatlon men frıstaıl ǵana ishinara tys qalǵan.
Qysqy sportpen shuǵyldaný úshin balalarǵa barlyq jaǵdaı jasalǵan ba?
Ekinshi tendensııa – hokkeıdiń, ásirese shaıbaly hokkeı men olımpıadalyq emes dopty hokkeıdiń tanymaldyǵynyń artýy. Bul sport túrlerinde sportshylar sany 5,8 myń adamǵa nemese 13,6 paıyzǵa kóbeıgen. Mamandar muny sońǵy jyldary hokkeıge degen jankúıerlik qyzyǵýshylyqtyń ósýimen jáne sonyń nátıjesinde balalardy seksııalarǵa berý suranysynyń artýymen baılanystyrady.
Jekelegen sport túrlerindegi ósim erekshe nazar aýdarady. Bıatlonmen aınalysýshylar sany 64,1 paıyzǵa, kıorlıngte 65,1 paıyzǵa, dopty hokkeıde 37,5 paıyzǵa artqan. Sondaı-aq mánerlep syrǵanaý (25,4%), frıstaıl (30%) jáne short-trek (11%) boıynsha da oń dınamıka baıqalady. Bul kórsetkishter el azamattary arasynda qysqy sporttyń keıbir túrleri birtindep suranysqa ıe bola bastaǵanyn ańǵartady.
El sportshylary qysqy Olımpıada oıyndarynda qandaı kıim úlgisimen óner kórsetedi?
Sonymen birge, elde áli de mardymsyz damyp kele jatqan baǵyttar bar. Sonyń biri – skı-alpınızm. Taýǵa shańǵymen kóterilý, jyldam túsý jáne alpınıstik daǵdylardy biriktiretin bul sport túrimen elimizde bar-joǵy alty adam ǵana aınalysady. Resmı derekke súıensek, Qazaqstanda skı-alpınızmniń bir ǵana seksııasy bar, onda jalǵyz jattyqtyrýshy jumys isteıdi.
Qazaqstan telearnalary qysqy Olımpıada oıyndaryn tikeleı efırde kórsetedi
Qoryta aıtqanda, Olımpıada qarsańynda Qazaqstandaǵy qysqy sporttyń damýy birkelki emes ekenin baıqaýǵa bolady. Birqatar baǵytta ósim bar, alaıda ınfraqurylym men buqaralyq tartylys álsiz sport túrleri de jetkilikti. Jumsalǵan mıllıardtardyń naqty nátıjesi medal sanymen ǵana emes, osy salanyń uzaq merzimdi damýyna qosqan úlesimen ólshenýi tıis.