Keshe Joǵarǵy Sot Tóraǵasy Qaırat Mámı buqaralyq aqparat quraldary basshylary men qyzmetkerlerin, sottardyń baspasóz hatshylaryn olardyń kásibı merekesi – Baılanys jáne aqparat qyzmetkerleri kúnimen quttyqtady.
Transparenttik jáne ashyqtyq – Joǵarǵy Sottyń jumysy basty basymdyqtarynyń biri bolyp tabylady. Barlyq óńirde BAQ-pen jumys jónindegi úılestirýshi-sýdıalar jáne sottardyń baspasóz qyzmeti belsendi jumys isteýde. Olardyń mindeti – BAQ-pen ózara baılanys ornatý jáne sottar qyzmetin jarııalaý boıynsha keshendi aqparattyq saıasat júrgizý.
Sottar men úkimettik emes uıymdar arasynda syndarly yntymaqtastyq ornady. Olardyń arasynda «Ádil sóz» halyqaralyq sóz bostandyǵyn qorǵaý uıymy, EQYU-nyń Astanadaǵy baǵdarlamalar ofısi, Internıýs, Qazaqstan Jýrnalıster odaǵy, Bas redaktorlar klýby sekildi uıymdar bar. Joǵarǵy Sottyń qoldaýymen elimizdiń toǵyz óńirinde ókildigi jumys isteıtin Sot reporterleriniń gıldııasy quryldy.
Kezdesý sheńberinde Joǵarǵy Sot Tóraǵasy «100 naqty qadam – barshaǵa arnalǵan qazirgi zamanǵy memleket» Ult josparyna sáıkes sot júıesin reformalaý baǵytynda júrgizilip jatqan jumystar týraly aıtyp ótti.
Joǵarǵy Sottyń janynan Halyqaralyq konsýltatıvtik keńes qurý kózdelýde. Atalǵan Keńes Joǵarǵy Sotqa halyqaralyq ozyq standarttardy jáne sot tájirıbesin qazaqstandyq sot tóreligine qoldanýǵa kómektesetin bolady. Onyń quramyna belgili zańgerler, ekonomıster, qarjygerler, quqyqtyń jekelegen tar salalarynyń mamandary, birinshi kezekte, sheteldik sarapshylar enetin bolady.
Sot júıesinde jańa aqparattyq-kommýnıkasııalyq tehnologııalardy engizýdi keńeıtý boıynsha jumys jalǵasyn tabady.
Is-sharanyń sońynda Qaırat Mámı kezdesýge qatysýshylarǵa sot júıesiniń qyzmetin aqparattyq jarııalaýdaǵy belsendi jumysy úshin alǵys bildirip, olarǵa Qurmet gramotalary men baǵaly syılyqtar tapsyrdy.
«Egemen-aqparat».