Akademık Qanysh Sátbaevtyń ǵylymı murasyn kópshilikke tanytý maqsatynda ashylǵan ortalyq kitaphanalyq, arhıvtik qorlardaǵy materıaldar negizinde jáne ǵalymnyń jeke zattarymen tolyqty, dep habarlaıdy Egemen.kz.
Ortalyq zertteýshilerge, stýdentterge, oqýshylar men ǵylymǵa qyzyǵýshylar úshin derekkózdermen, bilim berý materıaldarymen jumys isteýge múmkindik beredi.
Kelýshiler úshin «Qanysh álemi» portaly, «Satpaev AI» qosymshasy, kitaphanalyq resýrstar, beınedárister men arhıvtik materıaldar qoljetimdi. Bul resýrstar júıeli túrde jańartylyp, tolyqtyrylyp otyrady. Bolashaqta «Qanysh álemi» platformasy Sátbaev esimimen baılanysty mektepterdiń, mýzeılerdiń, kitaphanalar, ınstıtýttar men ǵylymı ortalyqtardyń qorlaryn biriktiretin biryńǵaı bilim ortalyǵy retinde damıtyn bolady.
«Qanysh álemi» portaly men saıtynda Qanysh Sátbaevtyń irgeli 10 tomdyq shyǵarmalar jınaǵy, sondaı-aq M.O.Áýezov atyndaǵy Ádebıet jáne óner ınstıtýtymen birlesken joba aıasynda daıyndalǵan akademııalyq eńbekteriniń tolyq 5 tomdyq jınaǵy bar.
Sıfrlyq ekojúıesinde geologııa mamandyǵynyń stýdentteri ázirlegen «Satbayev AI» qosymshasy jumys isteıdi.
Ortalyq Qanysh Sátbaevtyń 125 jyldyǵyna arnalǵan respýblıkalyq is-sharalar jospary aıasynda Sátbaev ýnıversıtetiniń professory Baqytjan Amralınovanyń jetekshiligimen júrgizilgen «Akademık Q.I.Sátbaevtyń ǵylymı-mádenı murasyn zertteý – Qazaqstannyń ǵylymı mektepterin damytý joly» atty baǵdarlamalyq-nysanaly qarjylandyrý jobasyn iske asyrý nátıjesinde ashyldy. Joba ǵalymnyń murasyn júıeli túrde zertteýge, saqtaýǵa jáne nasıhattaýǵa múmkindik berip, ǵylymı-zertteý jumystaryn júrgizýde derekkózge qoljetimdilikti qamtamasyz etedi.