Qalıbek Qýanyshbaev atyndaǵy Qazaq ulttyq mýzykalyq drama teatry sahnasynda 14–15 aqpan kúnderi Ońtústik Koreıa, Reseı men Qazaqstan teatrlarynyń birlesken jobasy – «Parıjdegi eki áıel» dramasy kórermenin qýantady.
Aıtýly spaktakl – tek óner emes, tarıhı oqıǵalar men adam taǵdyryn zertteıtin kórkemdik tájirıbe. Joba Ońtústik Koreıanyń táýelsizdik alǵanyna 80 jyl tolýyna arnalǵan. Alǵashqy kórsetilimi 2025 jyly Seýlde ótti. Astanadaǵy kórsetilim Ońtústik Koreıa Respýblıkasynyń elshiligi men Koreı mádenı ortalyǵynyń qoldaýymen uıymdastyrylyp otyr.
Qoıylym oqıǵasy 1940 jyldardaǵy Parıjde órbıdi. Lıýksembýrg baǵynda kezdesken eki áıel – Koreıanyń alǵashqy kásibı áıel sýretshisi, táýelsizdik jolyndaǵy kúresker Na He Sok pen A.P.Chehovtyń «Shıe baǵy» pesasyndaǵy Ranevskaıa ótken ómir, joǵalǵan esimder, azap pen úmit týraly syr shertedi. Naqty tarıhı tulǵa men ádebı keıipkerdiń toǵysýy arqyly qoıylym táýelsizdiktiń mánin jeke adam taǵdyry turǵysynan ashady.
Jobanyń basty ereksheligi – úsh eldiń akterleri bir sahnada óner kórsetýi. Qazaqstan atynan Qalıbek Qýanyshbaev atyndaǵy Qazaq ulttyq mýzykalyq drama teatrynyń ártisteri – eńbek sińirgen qaıratker, akter Asylbek Qapaev pen «Daryn» Memlekettik jastar syılyǵynyń laýreaty, aktrısa Aqmaral Tanabaeva qatysady. Sonymen qatar Reseıdiń Stanıslavskıı atyndaǵy Elektroteatry men Ońtústik Koreıanyń «PIAC» teatrynyń akterleri sahnaǵa shyǵady.
Ártisterdi irikteý ótken jyldyń qańtar aıynda ótti. Koreıanyń «PIAC» teatrynyń art-dırektory, rejısser Ra Chjın Hvan Qazaqstanǵa arnaıy kelip, kastıng arqyly qatysýshylardy tańdady.
Spektakl sahna tilinde Koreıanyń azattyq qozǵalysyn, Eýrazııa keńistigindegi dıaspora tarıhyn, tarıhı jady men adamgershilik qundylyqtardy qaıta jańǵyrtady. Qoıylymda Iýn Don Djý men I Iýk Sanyń poezııasy, F.Dostoevskıı, A.Pýshkın, Abaı shyǵarmalarymen qatar qazaq ánderi de tamasha úılesim taýyp, azattyq uǵymyn jalpyadamzattyq deńgeıge kóteredi.
«Bul spektakl tek ótkendi eske alýmen shektelmeıdi. Aýyr estelikter arqyly búgingi adamdy qalpyna keltirip, bir-birimizdi túsinetin bolashaqty elestetýge múmkindik beredi. Biz shynymen bir-birimizdi qabyldaı alamyz ba?», deıdi qoıylym rejısser Ra Chjın Hvan.
Spektakl qazaq, orys jáne koreı tilderinde ekrandyq aýdarmamen ótedi. Aıtýly premera tarıhı jady men mádenı kóptúrlilikti saqtap qana qoımaı, kórermenge oı salyp, adamgershilik qundylyqtardy túsinýge múmkindik beretin erekshe mádenı is-shara.