Almatyda «Revmatologııa, pýlmonologııa, nefrologııa, gastroenterologııa jáne endokrınologııadaǵy sabaqtas máseleler» atty VII ǵylymı-praktıkalyq konferensııasy aıaqtaldy, dep habarlaıdy Egemen.kz.
Májiliske terapııalyq baǵyttaǵy tájirıbeli mamandarǵa qosa, jas kadrlar da qatysty.
Elimizdiń jetekshi revmatolog, terapevt, pýlmonolog, nefrolog, gastroenterolog, endokrınolog syndy mamandarynyń basyn qosqan jıynǵa Kardıologııa jáne ishki aýrýlar ǵylymı-zertteý ınstıtýty men Qazaqstan revmatologtar alqasy uıytqy boldy.
KIAǴZI Basqarma tóraǵasy Rústem Tóleýtaev: «Biz óńirlik medısınalyq uıymdarǵa uıymdastyrýshylyq-ádistemelik kómek kórsetip kelemiz. Revmatologııada pánaralyq tásil asa qajet, sebebi ımmýndyq-qabyný aýrýlary júıeli sıpatqa ıe jáne jıi komorbıdti patologııalarmen qatar júredi. Revmatologtardyń kardıolog, nefrolog, pýlmonolog sııaqty basqa da mamandarmen birige áreket etýi pasıentterdi saraptamalyq deńgeıde júrgizýge, aýrý belsendiligin baqylaı otyryp, qaýip-qaterlerdi tómendetýge múmkindik beredi. Sonymen qatar, ınstıtýt mamandarynyń óńirlik áriptestermen ózara baılanysy mańyzdy ról atqarady», dep atap ótti.
Instıtýttyń terapııalyq qyzmet jónindegi Basqarma tóraǵasynyń orynbasary Ǵalymjan Toǵyzbaev ta túrli baǵyttaǵy mamandardyń kúsh-jigerin biriktirý pánaralyq ózara is-qımyldy jetildirýge, revmatologııalyq aýrýlary bar pasıentterdi dıagnostıkalaý men emdeý sapasyn arttyrýǵa yqpal etetinin naqty mysaldarmen dáıektedi.
Ǵylymı baǵdarlamada aýtoımmýndyq revmatologııalyq aýrýlar kezindegi ókpeniń ınterstısıaldy dertteri, sozylmaly búırek aýrýyn pánaralyq júrgizý, revmatıkalyq patologııalardaǵy endokrındik buzylystar, gastroenterologııalyq asqynýlardyń klınıkalyq aspektileri, sondaı-aq psorıazdyq artrıtti, ankılozdy spondıloartrıt pen júıeli qyzyl jegini emdeýdiń zamanaýı strategııalary erekshe nazarǵa alyndy.
Konferensııa barysynda otandyq sarapshylar júıeli aýtoımmýndyq aýrýlardyń jiktelýin, dıagnostıkasy, emdelýi jónindegi sońǵy derekterdi, kúrdeli komorbıdti pasıentterdi júrgizýdiń qazirgi klınıkalyq tásilderin, naqty klınıkalyq jaǵdaılar men tájirıbelik sheshim qabyldaý algorıtmderin talqylandy.