2026 jylǵy 15 aqpan kúni saǵat 15.00-de Astana qalasyndaǵy Jaqsylyq Úshkempirov atyndaǵy Jekpe-jek saraıynda kásibı sýmo sheberi Ersin Baltaǵulmen kezdesý ótedi, dep habarlaıdy Egemen.kz.
Ersin Baltaǵul – qazaqtan shyqqan tuńǵysh kásibı sýmoshy ári qazirgi tańda Japonııada joǵary nátıjelerge qol jetkizgen Qazaqstannyń jalǵyz ókili. Ol sporttyq jolyn qazaq kúresi men dzıýdodan bastap, ulttyq mektepten shyńdalyp, halyqaralyq deńgeıde tabysqa jetken.
Almaty qalasynyń týmasy Japonııadaǵy Nıhon ýnıversıtetin tamamdaǵannan keıin kásibı sýmoda Kınbozan Harýkı laqap atymen tanymal bolǵan. Boıy 195 santımetr, salmaǵy 178 keli bolatyn sportshy búgingi tańda sýmo kúresiniń eń joǵarǵy dıvızıony – Makýýtıde óner kórsetedi.
Jekpe jek saraıynda josparlanǵan kezdesýge qazaq kúresiniń absolıýtti salmaq dárejesinde synǵa túsip júrgen túıe balýandar, sondaı-aq Qazaqstan Barysy respýblıkalyq týrnıriniń jeńimpaz-júldegerleri – Ulan Rysqul, Rýslan Ábdirazaqov, Muhıt Tursynov, Marat Baıqamurov, Erasyl Qajybaev, Maqsat Isaǵabylov jáne taǵy basqalar qatysady.
Tokıoda Prezıdent Qasym-Jomart Toqaev kásipqoı sýmoshy Ersin Baltaǵulmen kezdesti
Shara barysynda qatysýshylar sportshynyń kásibı joly, Japonııadaǵy daıyndyq júıesi, sýmo mádenıeti, sondaı-aq ulttyq sporttan halyqaralyq arenaǵa shyǵý tájirıbesi jóninde tyń aqparat alý múmkindigine ıe bolady.
Aıta ketsek, Qazaqstandyq kásibı sýmo sheberi Japonııada ótken «Hasý basıo – 2025» kýboginde úshinshi orynǵa ıe bolyp, el tarıhyndaǵy mańyzdy jetistikke qol jetkizgen bolatyn. 15 kúnge sozylǵan týrnırde Kınbozan Harýkı qarsylastaryn 13 ret jeńip, 2 ret jeńilgen.