Túrkistan oblysynyń Jetisaı aýdanyna qarasty Útirtóbe aýylynda Astanada shuǵyl kómek kórsetý kezinde aýyr jaraqat alyp, kóz jumǵan feldsher Uldana Myrzýannyń rýhyna taǵzym jasaldy. Aýyl ambýlatorııasynyń ǵımaratyna onyń esimi jazylǵan eskertkish taqta ornatylyp, el-jurt batyr qyzdyń erligin eske aldy, dep jazady Egemen.kz.
Is-shara Jetisaı aýdanynyń J.Eralıev aýyldyq okrýgine qarasty Útirtóbe eldi mekeninde ótti. Eskertkish taqtany ornatý bastamasyn aýyl aqsaqaldary kótergen eken. Saltanatty rásimge aýdan ákiminiń orynbasary Nurken Álmesh, aýdandyq máslıhat depýtaty Oljas Qanybekov, Túrkistan oblystyq jedel járdem stansııasynyń basshysy Baqyt Myrzageldıev, «Asyqata» aýrýhanasy basshysynyń orynbasary Erǵalı Sopbekov qatysty.
Sondaı-aq marqumnyń anasy Sálıma Ishanqulqyzy, týystary, ustazdary men aýyl turǵyndary jınalyp, aq halatty abzal jannyń jarqyn beınesin eske aldy.
Uldana Qaldarhanqyzy 2017-2021 jyldary Astana qalasyndaǵy «Danalyq» kolledjinde «Emdeý isi» mamandyǵy boıynsha bilim alyp, feldsher biliktiligin ıelengen. Oqý ornyn úzdik dıplommen támamdaǵan jas maman keıin Baıqońyr aýdany jedel járdem podstansııasynda brıgada aǵa-feldsheri bolyp eńbek etti.
Áriptesteriniń aıtýynsha, ol kásibı adaldyǵymen, shuǵyl jaǵdaılarda batyl sheshim qabyldaı biletin tabandylyǵymen erekshelengen. Qaýiptiń aldyńǵy shebinde júrip, adam ómirin saqtap qalýdy basty murat etken jas maman qyzmettik mindetin atqarý barysynda erlikpen qaza tapty.
Astanada feldsher Uldana Myrzýandy aqtyq saparǵa shyǵaryp saldy
Memlekettik marapat jáne el qurmetiJıyn barysynda Uldananyń adamgershilik bolmysy, el esinde qalǵan eńbegi týraly jyly estelikter aıtyldy.
Memleket basshysy Qasym-Jomart Toqaevtyń Jarlyǵymen Uldana Myrzýan «Erligi úshin» medalimen marapattalǵany atap ótildi. Marqumǵa quran baǵyshtalyp, duǵa jasaldy.
Aýyldastarynyń bastamasymen ambýlatorııaǵa ornatylǵan eskertkish taqta men demalys jáne sport aımaǵyna onyń esimin berý – erlikke kórsetilgen qurmettiń aıqyn kórinisi.
Astanada medısınalyq kolledjdegi dárishanaǵa Uldana Myrzýannyń esimi beriledi
Qysqa ǵumyrynda kásibine adaldyqtyń, adam ómiri úshin kúrestegi janqııarlyqtyń úlgisin tanytqan Uldana Myrzýannyń esimi el jadynda saqtalady. Bul – ótkenge taǵzym ǵana emes, keıingi urpaqqa amanat.
Astanada feldsher Uldana Myrzýanǵa arnalǵan eskertkish taqta ornatyldy