Aıryqsha tarıhy bar Abaı atyndaǵy respýblıkalyq mamandandyrylǵan daryndy balalarǵa arnalǵan qazaq tili men ádebıetin tereńdete oqytatyn mektep-ınternaty bıyl úlken tabysqa jetip otyr. 10 birdeı oqýshy UBT nátıjesinde «Altyn belgi» alsa, 43 mektep bitirýshi halyqaralyq, respýblıkalyq olımpıadalarda top jardy. Bıyl talantty túlekterge «Altyn belgilerin» tabystaý úshin Bilim jáne ǵylym vıse-mınıstri Takır Balyqbaev atalmysh mektepke arnaıy keldi.
Osylaısha, atalmysh bilim ordasy bilimniń bıik deńgeıin kórsetti. Ata-ana da on jyl boıy balasynyń bolashaǵy úshin tókken teriniń nátıjesin kórdi. Mektep boıynsha UBT-nyń ortasha kórsetkishi 102 baldy qurady.
Vıse-mınıstr respýblıkalyq deńgeıdegi mekteptiń daryndy túlekterine attestat tapsyrý saltanatynda: «Sizderdi mektep bitirgenderińizben ǵana emes, osy oqý ornyn tańdaǵan kúnderińizben de quttyqtaımyn! Bul – ulttyń ıisi ańqyǵan erekshe taǵdyrly mektep! Bul mektepten qoǵam qaıratkerleri, tanymal ánshiler, talaı ataqty tulǵalar, aıtýly jýrnalısterdiń legi shyqqan. Jaqsy bilim – jaqsy bolashaqtyń kepili», dedi.
«Altyn belgi» ıeleri medaldaryn vıse-mınıstrdiń qolynan alsa, halyqaralyq jarystardyń jeńimpazdaryna attestattaryn osy mekteptiń túlegi, general-leıtenant, memleket jáne qoǵam qaıratkeri Ádil Shaıahmetov tabystady.
Reti kelip turǵanda, elý jyl boıy Almatydaǵy «№2 mektep-ınternat» atanǵan bilim mekemesi 1957 jyly respýblıkadaǵy shopandardyń balalary úshin degen oımen qaladaǵy №12 mektepten keıin ashylǵan ekinshi qazaq mektebi ekenin eske sala ketý kerek. Bul bilim uıasy qaı kezden bastap qazaq tili men ádebıetin tereńdetip oqyta bastady desek, Jeltoqsan oqıǵasynan keıin ulttyń rýhy men namysy oıandy. О́z tilimizdi ulyqtamasaq halyq retinde joıylyp ketetinimizdi uqqan el azamattarynyń aralasýymen, 1988 jyly Qazaq KSR Mınıstrler Keńesiniń qaýlysy shyǵyp, mektep – respýblıkalyq qazaq tili men ádebıetin tereńdete oqytatyn bilim uıasy mártebesine ıe boldy. 2003 jyly respýblıkalyq mamandandyrylǵan daryndy balalarǵa arnalǵan qazaq tili men ádebıetin tereńdete oqytatyn orta mektep-ınternaty dep ataýy qaıta tolyqtyryldy.
Almatydaı úlken qaladan aýyldyń ıisin shyǵarǵan, shákirtteri tek qazaqsha sóıleıtin, qazaqsha oılaıtyn, qazaqsha tús kóretin osynaý mektep talaı tulǵalardy túletken. Dúnıejúzi qazaqtary qaýymdastyǵy tóraǵasynyń birinshi orynbasary Talǵat Mamashev, ataqty kompozıtor Keńes Dúısekeev, QR UQK akademııasynyń burynǵy basshysy, general-leıtenant Ádil Shaıahmetov, Parlament Májilisiniń depýtaty Máýlen Áshimbaev, halyqaralyq Túrki akademııasynyń prezıdenti Darhan Qydyráli syndy azamattar osy №2 mektep-ınternatta oqyǵanyn árdaıym maqtan tutady.
Endi, mine, zaman ózgerdi. Bilimde de, ónerde de, ómirde de báseke bar. Bala boıyndaǵy daryndy damytýǵa birinshi kezekte ata-ana jaýapty bolyp turǵan kezeń. Qysqasy, der kezinde sapaly bilim alýǵa, óner úırenýge, til meńgerýge júrdim-bardym qaraǵan bala da, baǵdar berýge yqpal etpegen áke-sheshe de «qolymdy mezgilinen kesh sermedimniń» kerin keltiredi. Sondyqtan, memleketimiz de daryndy balalardy qoldaýda, tegin oqytyp, talantyn ashýda qol qýsyryp otyrǵan joq. Osyndaı bilim mekemeleriniń biri –Abaı atyndaǵy respýblıkalyq mamandandyrylǵan daryndy balalarǵa arnalǵan qazaq tili men ádebıetin tereńdete oqytatyn orta mektep-ınternaty.
Egemendi elimizdiń eń basty maqsaty órkenıetti elder qataryna kóterilý bolsa, al órkenıetke jetýde jan-jaqty damyǵan, rýhanı baı tulǵanyń alatyn orny erekshe. Kemel adamnyń bir qasıeti – til baılyǵy, óz oıyn naqty, tereń maǵynaly ári kórkem jetkize bilý bolsa, bul ónerdiń bári de mektepte bar. Muǵalimderdiń mindetin yqylaspen atqarýyna jaǵdaı jasalǵan, baı kitaphana jumys isteıdi.
Bıyl ádebıetke, jazýǵa beıimi bar shákirtterdiń «Shyńdaý» atty jınaǵy shyǵarylypty. Arýjan Arynovanyń «Kóńil tolqyny», Jansaıa Sebepovanyń óleńder jınaǵy, Dana Rýslanqyzynyń «Sezim tamshylary» atty jeke kitaptary jaryq kórgen.
Mektep oqýshylary ál-Farabı atyndaǵy Qazaq ulttyq ýnıversıtetinde, Reseıde ótken «Sozvezdıe-2015», «Matematıka jáne jobalaý-2015» olımpıadasy men Iаkýtııada ótken halyqaralyq baıqaýǵa qatysyp, júldeli oryndardan tabylsa, Baıqońyr qalasyndaǵy «Ǵylym álemin ashamyz» halyqaralyq jarysyna 12 oqýshy qatysyp, bilim granttaryna ıe bolypty.
– Mektebimizge respýblıkanyń túkpir-túkpirinen daryndy balalar tereń bilim alamyz degen nıetpen keledi. Ylǵı úzdikter jınalǵan ortadan júırikterdiń ǵana ozyp shyǵary sózsiz. Balalar bir birinen qalmas úshin baryn salyp oqıdy. Onyń ústine búgingi zaman – búkil jańa tehnologııalardyń qaryshtap damyǵan zamany. Tipti, teledıdardy sózben qosyp, sózben basqaratyn dárejege de jettik. Innovasııalyq jáne ıntellektýaldyq baǵytta bilim berý baǵdarlamalaryn barynsha jetildirýdi kózdep otyrmyz. Endigi jylǵy meje – oqýshylardyń bilim sapasyn munan da joǵary deńgeıge kóterý, – deıdi mektep dırektory, bilim berý isiniń úzdigi Muhtar Botabaıuly Ibraımov.
Aınash ESALI,
«Egemen Qazaqstan».
ALMATY.