Qaıyrǵalı Sısekenov – Batys Qazaqstan elektrjelilik kompanııasynda 35 jyl úzilissiz eńbek etip kele jatqan maıtalman júrgizýshi. О́tken jyly qarapaıym eńbek adamynyń mańdaı teri joǵary baǵalanyp, III dárejeli «Eńbek dańqy» ordenimen marapattaldy.
Taıpaq óńirinde 1965 jyly dúnıege kelgen Qaıyrǵalı Jumaulynyń eńbek kitapshasynda kóp jazba joq. 1991 jylǵy sáýirde Batys Qazaqstan aımaqtyq elektrjelilik kompanııasynyń mehanıkalandyrý jáne avtomobıl kóligi qyzmetine júrgizýshi bolyp ornalasqan. Sodan beri attaı 35 jyl ótipti. Osy salada taban aýdarmaı qyzmet etip kele jatqan keıipkerimiz 2006 jyly «Batys energetıka ardageri» ataǵyna ıe bolǵan. Tájirıbesi tolysqan maman retinde áriptesteri ony aıryqsha qurmetteıdi.
«Men mekemege jumysqa kelgende Qaıyrǵalı aǵa san jylǵy eńbek ótili bar tájirıbeli maman edi. Qazir bir salada, bir brıgadada qyzmet etemiz. Ol «ETL-35» atalatyn elektr-tehnıkalyq zerthanamyzdyń kóligin tizgindeıdi. Únemi sapardamyz, aýyl-aımaqty aralap, qosalqy stansalarǵa baramyz. Jyldyq kestege sáıkes oblystyń túkpir-túkpirin sharlap, elektr qurylǵylaryn profılaktıkalyq synaqtan ótkizip, aqaýlardy anyqtaımyz.Únemi jolda júretindikten, kóligimizdiń kidirmeýi, dittegen jerge tez jetýimiz óte mańyzdy. Qaıyrǵalı aǵa eshqashan jolda qaldyrǵan emes. Bul kisiniń «temir tulpary» jyldyń qaı mezgilinde de saqadaı saı», deıdi mekemeniń oqshaýlaý jáne kerneýden qorǵaý qyzmetiniń basshysy Sanjar Ámireev.
Qazaqta «mal ıesine tartady» degen sóz bar. Qaırekeń qyzmettik kóligin árdaıym babynda ustaıdy: aı saıynǵy tehnıkalyq kútim, josparly jóndeý, qaýipsizdik, baqylaý tetikterin tekserip otyrý – buljymas daǵdyǵa aınalǵan. «Aýyryp em izdegenshe, aýyrmaıtyn jol izde» qaǵıdasy adamǵa ǵana emes, tehnıkaǵa da qatysty deıdi ol. Bul, árıne, kóp jylǵy tájirıbe men jaýapkershilikten týyndaıtyn qasıet.
Energetıkterdiń jumysy áskerı qyzmetke uqsas. Táýliktiń kez kelgen ýaqytynda, aýa raıynyń qolaısyzdyǵyna qaramastan jolǵa shyǵýǵa týra keledi. Osyndaı sátte Qaıyrǵalı Jumaulynyń sabyrly minezi men senimdi is-áreketi búkil topqa demeý bolady.
2024 jylǵy kóktemde Batys Qazaqstan oblysynda alapat sý tasqyny boldy. Tilsiz jaý kóptegen eldi mekenge qaýip tóndirdi. Birneshe shaqyrymdyq elektr jelisi sý astynda qalyp, baǵanalar qulady. Bórli aýdanynyń Aqsaı qalasynda, Pýgachev aýylynda energetıkter qutqarýshylarmen birge kúni-túni qyzmette júrdi. Qýaty 35/10 kV «Araltal» qosalqy stansasyn qalpyna keltirý ońaıǵa soqpady. Qulaǵan tireýlerdi qaıta ornatý, tirekter men symdardy aýystyrý úshin «Batys Qazaqstan AEJK» JShS-nyń jedel toby sol jerden tabyldy. Arnasynan asqan Shyńǵyrlaý ózeniniń jaǵasynda, sarqyraǵan sý men kúrkiregen seńmen alysyp júrip, Qaıyrǵalı Jumauly 1 shaqyrym qashyqtyqtaǵy elektr ótkizgishin aýystyryp, buzylǵan 10 kV elektr jelisin qalpyna keltirip jatqan mamandarǵa erekshe kómek kórsetti. Sondaı-aq tún ishinde «Aqsaıjylqýat» memlekettik kásipornynyń 600 metrlik tirekterin, oqshaýlaǵyshtar men ótkizgishterdi aýystyrǵany da áriptesteriniń esinde.
«Energetıka salasy – ekonomıkanyń kúretamyry. Jaryq pen jylýdy úzdiksiz jetkizip otyrǵan mamandar eldiń turaqty damýy men halyqtyń turmys sapasyna tikeleı úles qosyp keledi. Qystyń qaqaǵan aıazynda da, jazdyń aptap ystyǵynda da biz táýlik boıy tynymsyz eńbek etemiz. Ásirese keıingi kezde salada ınfraqurylymdy jańǵyrtý, sıfrlandyrý men balamaly energııa kózderin damytý baǵytynda mańyzdy jobalar júzege asyrylyp jatyr. Elimiz eńbegimizdi elep, ótken jyldyń sońynda Prezıdent III dárejeli «Eńbek dańqy» ordenin óz qolymen keýdemizge taqty. Qarapaıym jumysshynyń eńbegi eskerilip, mereıi óskeni – úlken mártebe. Bizdiń jetistik – ujymdyq eńbektiń nátıjesi. Máselen, men óz áriptesterim – ýchaske basshysy Sanjar Ámireev pen ınjener Altynbek Kereevtiń kóptegen jumysshy-eńbekkerdi baýlyp, tárbıelep júrgen eńbegi eskerilse, keleshekte olardyń da qajyrly isi óz baǵasyn alsa dep tileımin», deıdi eńbek ardageri.
Energetıka – qolǵa ustalmaıtyn, kózge kórinbeıtin, biraq qazirgi ekonomıkanyń eń qajetti sheshýshi kúshi. Aǵzany túgel torlap, tyrnaqtyń ushynan tóbe quıqaǵa deıin taralatyn júıke tamyrlary sekildi, energetıka da búkil salany qamtyp jatyr. Muny qarapaıym adam bar kezinde baıqamas, biraq óshken sátte birden izdeıtini anyq. Endeshe, osyndaı mańyzdy salanyń úzdiksiz jumys istep turýyna úles qosqan ár adamnyń eńbegi qadirli.
Batys Qazaqstan oblysy