Parlament Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev Nıderland Koroldiginiń Qazaqstandaǵy Tótenshe jáne ókiletti elshisi Henrı Hýbert Drıssermen kezdesti, dep habarlady Májilistiń baspasóz qyzmeti.
M.Áshimbaev eki el arasyndaǵy qatynastardyń qarqyndy jáne tıimdi damyp kele jatqanyn ataı otyryp, Nıderland Qazaqstannyń Eýropadaǵy birden-bir isker seriktesi ekendigin jetkizdi. Koroldik Qazaqstan Táýelsizdigin alǵaly bergi ýaqytta elimizdiń ekonomıkasyna 50 mlrd. dollardan astam qarjy quıdy.
Aımaqtyq jáne ǵalamdyq úderisterge qatysý barysyna toqtalǵan Májilistiń komıtet tóraǵasy Qazaqstannyń 2017-2018 jyldary BUU Qaýipsizdik Keńesine turaqty emes múshe bolýǵa umtylysyn qoldaıtynynan úmitti ekendigin bildirdi.
Taraptar «100 naqty qadam» sheńberinde jasalyp jatqan ınstıtýttyq 5 reformaǵa aıryqsha nazar aýdardy. H.Drısserdiń málimdeýinshe, Qazaqstan Eýropaǵa qaýipsizdik, turaqtylyq pen órkendeý ortalyǵy retinde mańyzdy.
Júrgizilip jatqan reformalar boıynsha depýtattardyń jumysy týraly M.Áshimbaev bizdiń el Nıderlandtyń zańnamalyq qyzmet salasynyń tájirıbesine qyzyǵýshylyq tanytatynyn bildirdi. Sonymen qatar, májilismen eki el arasyndaǵy parlamentaralyq yntymaqtastyqtyń odan ári damýynyń mańyzyna toqtaldy.
Taraptar bolashaq ózara baılanystar baǵytynyń ishinde saýda-ekonomıkalyq, mádenı-izgilik baılanystardy erekshe atady. H.Drısser Qazaqstandy DSU-ǵa enýimen quttyqtady.