Qaırat Mámıdiń tóraǵalyǵymen Qazaqstan Respýblıkasy Joǵarǵy Sotynyń kezekti jalpy otyrysy ótti. Otyrystyń kún tártibine sáıkes avtorlyq jáne sabaqtas quqyqty qorǵaýǵa, qylmystyq jaza taǵaıyndaýǵa qatysty Joǵarǵy Sottyń eki normatıvtik qaýlysynyń jobasy talqylandy.
Alǵashqy jobany tanystyra kele, Joǵarǵy Sot sýdıasy Irına Kalashnıkova zııatkerlik qyzmet nysandaryn qorǵaýǵa jáne qoldanýǵa qatysty qatynastar azamattyq quqyqtyń normalarymen retteletindigin atap ótti. Avtorlyq quqyqty qorǵaý respýblıkanyń ekonomıkalyq ósiminiń turaqty jáne qarqyndy damýyn qamtamasyz etýdiń mańyzdy sharttarynyń biri retinde qarastyrylady jáne Qazaqstannyń DSU-ǵa kirýi qarsańynda aıryqsha ózekti bolyp tabylady.
Zııatkerlik menshik salasyndaǵy zańnamaǵa sońǵy jyldary engizilgen ózgerister avtorlyq jáne sabaqtas quqyqty qorǵaý týraly zań normalaryn sot tájirıbesinde durys qoldaný maqsatynda osy normatıvtik qaýlyny ázirleýge qajettilik týdyrdy.
Joǵarǵy Sottyń sýdıasy Meıram Janǵuttınov ekinshi normatıvtik qaýly jobasy týraly aıta kele, bul jobanyń jaza taǵaıyndaý máselesi boıynsha jańa qylmystyq jáne qylmystyq-prosestik zańnama normalaryn birizdi qoldanýdy qamtamasyz etý maqsatynda ázirlengendigin atap ótti. Jobada respýblıka zańnamasynda buryn-sońdy bolmaǵan birqatar jańa erejeler qamtylǵan. Bular, atap aıtqanda, qylmystyq teris qylyqqa, kelisimdik is júrgizýdegi jaza taǵaıyndaýǵa qatysty normalar. Qylmystyq jaza taǵaıyndaý máseleleri boıynsha sot praktıkasy burynyraqta eki normatıvtik qaýlyda kórsetilgen bolatyn. Jańa Qylmystyq, Qylmystyq-prosestik jáne Qylmystyq atqarý kodeksteriniń qabyldanýyna baılanysty jaza taǵaıyndaý jónindegi jańa ınstıtýttardy túsindirý, jańa normatıvtik qaýly qabyldaýdyń qajettiligi týyndady.
Normatıvtik qaýlylar jobalaryn ázirleý barysynda osy máseleler boıynsha sot isteri zerdelenip, sot tájirıbeleri saraptan ótkizildi, sondaı-aq jergilikti sottardan, ǴKK músheleri men múddeli memlekettik organdardyń usynystary men eskertýleri eskerildi, dep habarlaıdy Joǵarǵy Sottyń baspasóz qyzmeti.