Almatyda jeńil relsti kólik (LRT) jelisiniń alǵashqy baǵytyn salý merzimi belgili boldy. Qazirgi ýaqytta joba memlekettik saraptamadan ótip jatyr. Sonymen qatar qala ákimdigi qurylysqa qajetti jer telimderi men jyljymaıtyn múlikterdi satyp alý jumystaryn bastaǵan, dep habarlaıdy Egemen.kz.
Almaty qalalyq jolaýshylar kóligi men jol qozǵalysyn uıymdastyrý basqarmasynyń basshysy Erjan Dıhanbaevtyń málimetinshe, jobanyń tehnıkalyq-ekonomıkalyq negizdemesine qatysty memlekettik saraptamanyń qorytyndysy 2026 jyldyń shilde aıynda daıyn bolady dep kútiledi. Osydan keıin qurylys jumystarynyń belsendi kezeńi bastalady.
Jospar boıynsha LRT qurylysy 2027 jyldyń ekinshi toqsanynda bastalyp, 2029 jyldyń ekinshi toqsanynda aıaqtalýy tıis. Joba aıasynda LRT jelisimen qatar depo da salynady.
Bir bıletpen eki adam ótýge bolmaıdy: LRT basshylyǵy jolaýshylarǵa eskertý jasady
Alǵashqy jeliniń uzyndyǵy 18,3 shaqyrymdy quraıdy. Baǵyt Tóle bı kóshesimen ótip, keıin Abylaı han dańǵyly arqyly Almaty-2 vokzalyna deıin jalǵasady. Odan ári Momyshuly kóshesimen Alataý aýdanyndaǵy ındýstrııalyq aımaqqa deıin barady.
Qazirgi tańda Tóle bı kóshesinde eski tramvaı relsterin bólshekteý jumystary júrgizilip jatyr.
Jobaǵa sáıkes, jeli eki baǵytty bolady. Barlyǵy 34 jolaýshylar platformasy salynyp, aıaldamalardyń araqashyqtyǵy orta eseppen 700 metrdi quraıdy.
LRT qurylysyna baılanysty Almaty ákimdigi 270 jer telimi men nysandy memleket qajetine alý týraly qaýly shyǵardy. Onyń ishinde turǵyn úıler, kommersııalyq nysandar jáne qala qurylymdarynyń balansyndaǵy ǵımarattar bar.
Jer telimderin satyp alý jumystary Almaly, Áýezov, Alataý jáne Jetisý aýdandaryn qamtıdy. Satyp alý merzimi 2028 jyldyń 31 jeltoqsanyna deıin jalǵasady.
Qosshydaǵy LRT qurylysyna baılanysty 2 myńnan astam aǵash kóshiriledi
Jyljymaıtyn múlik ıelerine naryqtyq baǵa boıynsha ótemaqy tólenedi. Eger menshik ıesi usynylǵan somamen kelispese, másele sot arqyly sheshiledi.