Jaqsylyq Alladan qaıtady deıdi. Al jaqsylyq jasasań kóńilińe nur bolyp quıylatyny anyq. Jaqsylyq jasaý – bizdiń ata-babamyzdan jalǵasqan uly qasıet. Munyń máni búgin de ózgergen joq. О́zgelerge únemi jaqsylyq jasap turatyn adamdar bar. Solardyń adamgershiligi men izgiligi arqasynda ómir úmiti úzilmeıdi. Armandar oryndalyp, bıik asýlar alynýda. Munyń naqty kórinisin Astana qalalyq balar úıiniń tárbıelenýshileri bastan keship otyr. Máselen, jyl basynan beri Astana qalalyq IID atalǵan balalar úıin qamqorlyqqa alǵan bolatyn. Sodan beri tárbıelenýshiler polıseıler uıymdastyrǵan barlyq is-sharalarǵa qýana da, qyzyǵa da qatysady. Kúnbe-kún olardy eleńdep kútedi.
Sebebi, elordalyq polıseıler balalar úıine bar jaqsylyqty ákelýde. Mádenı sharalar uıymdastyrylýda. О́tkende balalar IID bólinisteriniń kınologııalyq qyzmet ortalyǵynda ekskýrsııada bolyp, odan keıin polıseıler qoldaýymen muz aıdynynda konkı tepti. Qýanyshtarynda shek bolmady. Olardyń kópshiligi polıseılerdiń qalaı jumys isteıtinin, qyzmet atqarý barysynda qandaı qıyndyqtar jáne qaýip-qaterlerge tap bolatyny týraly habarsyz eken. Endi balalar polıseılerdiń naqty qandaı jumystar atqaratynyn bildi. Departament bólinisterin aralap, tanysqan olardyń kópshiligi, onyń ishinde qyzdar da quqyq qorǵaý organdarynyń jumysyna qyzyǵýshylyq tanytty.
Osylaısha, úzdiksiz júrgizilgen qaıyrymdylyq sharalary Naýryz toıyndaǵy merekelik sán-saltanatqa ulasty. Elordalyq Ishki ister departamentiniń májilis zalynda balalar óz qamqorshylarymen birge konsert qoıdy. Kórermenderge bı toptary, vokal dýetteri óner kórsetip, 4-synyp oqýshysy Zarına Omarqasova jáne 3-synyp oqýshysy Kırıll Vıshnevskıı dombyramen tógilte kúmbirletip kúı oryndady. Merekelik qoıylym qatysýshylarynyń biri, balalar úıiniń túlegi Mılana Serikova kóptegen án baıqaýlaryna qatysqan eken. Endi, mine, Astana qalasy IID-niń qarjylyq qoldaýy arqasynda Mılana kóp uzamaı Cheh Respýblıkasynda ótetin halyqaralyq baıqaýǵa da qatysatyn boldy. Onyń qýanyshynda shek joq. Elordalyq polısııa basshysy Amantaı Áýbákirov aldaǵy ýaqytta balalarǵa arnalǵan kóptegen birlesken is-sharalar ótetindigin jáne olarǵa arnap elordalyq polıseıler uıymdastyratyn ekskýrsııalar men túrli qyzyqty sharalar bar ekendigin aıtty.
Budan keıin IID qyzmetkerleri balalardy departament terrıtorııasynda ornalasqan murajaı muraǵattarymen tanystyrdy. Murajaı zalynda qalanyń ishki ister organdarynyń tarıhy jaıly syr shertetin eksponattar, tarıhı qujattar, qarý-jaraqtar, ótken jyldardaǵy polısııa qyzmetkerleriniń formalary, sport túrleri boıynsha respýblıkalyq jáne halyqaralyq jarystarda jeńip alǵan sporttyq nagradalar qoıylǵan. Bulardy kórip, balalar tań-tamasha qaldy. Sosyn olar ózderine arnap jaıylǵan merekelik aq dastarqan basyna otyrdy. Sol jerde olarǵa arnaıy daıyndalǵan kóptegen syılyqtar tabystaldy. Bul sátte, ne kerek, Astana qalalyq balalar úıi tárbıelenýshileri shattyqtan júzderi bal-bul jaınap, qýanyshtaryn jasyra almady. Iá, balalardyń qýanǵanyna ne jetsin!
Jalpy, 2015 jyl elordalyq polıseıler úshin «Halyq senimi – polısııa qýaty» uranymen ótýde ekendigin eske salamyz. Astana qalalyq IID bastyǵy, polısııa general-maıory Amantaı Áýbákirovtiń aıtýynsha, polısııa qyzmetkerleri jyl boıy qaıyrymdylyq sharalaryn, jappaı-mádenı jáne sporttyq is-sharalardy ótkize bermek. О́ıtkeni, shynaıy qaıyrymdylyqtyń el úshin ıgi qaıyrymy bolatynyn umytpaǵan jón.
Aleksandr TASBOLATOV,
«Egemen Qazaqstan».