Astanada «Ádilet» partııasynyń II sezi ótip, kún tártibinde partııany odan ári damytý, óńirlik fılıaldar qurý, uıymdyq qurylymdy nyǵaıtý men el damýy jolyndaǵy ortaq mindetter tóńireginde saıası kúshterdi toptastyrý máseleleri qaraldy.
Sezd qarsańynda strategııalyq sessııa uıymdastyrylyp, delegattar partııanyń aldaǵy kezeńdegi basym baǵyttaryn talqylady.
II sezd qatysýshylarynyń aldynda sóz sóılegen partııa tóraǵasy Aıbek Dádebaı elimizdiń jańa damý kezeńine aıaq basqanyn atap ótip, saıası kúshterden reformalardy qoldaý ǵana emes, halyqpen tyǵyz jumys júrgizý jáne azamattardyń suranystaryna naqty jaýap berýdi talap etetinin aıtty.
«Biz Prezıdent Qasym-Jomart Toqaevtyń Ádiletti Qazaqstan qurý baǵytyn tolyq qoldaımyz jáne ony memleketti uzaqmerzimdi nyǵaıtýdyń strategııalyq baǵdary dep sanaımyz. Alaıda reformalardyń tabysy memlekettik sheshimderge ǵana baılanysty emes. Ol qoǵamnyń ózgeristerge qatysýǵa daıyndyǵymen jáne saıası kúshterdiń jaýapkershilikpen ári jasampazdyqpen áreket ete bilýimen aıqyndalady. «Ádilet» partııasy qurylǵan kezde biz bir qarapaıym ári qaǵıdatty ustanymdy negizge aldyq: ádiletsiz turaqty damý bolmaıdy. Ádil erejeler ornaǵan jerde senim qalyptasady. Senim bar jerde ınvestısııa keledi, kásipkerlik damıdy, azamattyq belsendilik artyp, qoǵamdyq birlik nyǵaıady», dedi A.Dádebaı.
Sezdegi mańyzdy sheshimniń biri – eldiń barlyq óńirinde partııa fılıaldaryn qurý. Delegattar tıisti sheshimdi qoldap, fılıaldardyń qyzmet tártibin aıqyndaıtyn erejeni bekitti.
Partııa Saıası keńesiniń múshesi Bórihan Nurmuhamedovtiń aıtýynsha, partııanyń bolashaqtaǵy damýy óńirlerdegi tıimdi jumys jáne azamattarmen turaqty dıalogke tikeleı baılanysty.
«Partııanyń taǵdyry óńirlerde sheshiledi. Bizdiń jumysymyzdyń negizgi alańy da sol jerde. Azamattardyń senimi de óńirlerde qalyptasady. Adamdar partııany kún saıyn naqty isterine, bastamalaryna jáne nátıjelerine qarap baǵalaıdy. Sondyqtan oblystyq fılıaldar qoǵamdyq jáne saıası ómirdiń tolyqqandy ortalyǵyna aınalýǵa tıis», dedi B.Nurmuhamedov.
Partııa ókilderiniń aıtýynsha, óńirlik jelini damytý qoǵamdyq jumysqa jańa kóshbasshylardy tartýǵa jáne azamattardyń qoǵamdyq-saıası úderisterge qatysý múmkindigin keńeıtýge jol ashady.
«Partııalyq jeliniń damýy azamattarǵa memlekettik sheshimderdi qabyldaýǵa yqpal etip, azamattyq qoǵamdy nyǵaıtýǵa múmkindik beredi», dedi Qostanaı avtomobıl kóligi kolledjiniń dırektory ári partııa Saıası keńesiniń múshesi Dmıtrıı Pavlenko.
Sezd barysynda adam kapıtalyn damytý, bilim salasy, zamanaýı tehnologııalardy damytý men azamattyq qoǵam ınstıtýttaryn nyǵaıtý máseleleri de talqylandy.
Sezd jumysyn qorytyndylaı kele, qatysýshylar partııa quramyn keńeıtý men saıası qyzmettiń tıimdiligin arttyrý arqyly partııanyń áleýetin odan ári kúsheıtý máselesin qarastyrdy.
«Amanat» partııasynyń «Ádilet» partııasyna qosylý máselesi boıynsha sóılegen A.Dádebaı qazirgi zamannyń syn-qaterleri qoǵam aldynda turǵan naqty mindetterdi sheshýge baǵyttalǵan syndarly dıalog pen nátıjeli praktıkalyq jumysty talap etetinin atap ótti.
«Amanat» partııasynyń «Ádilet» partııasyna qosylýy – tar partııalyq múddeden joǵary turǵan, ulttyq jaýapkershilikke negizdelgen parasatty sheshim. Bul – qoǵamnyń el múddesi úshin birige alatynynyń naqty dáleli. Qoǵam men memleket aldyndaǵy jáne keler urpaq aldyndaǵy jaýapkershilikten týyndaǵan, eldik berekege bastaıtyn baılam», dedi partııa tóraǵasy.
Talqylaý qorytyndysynda delegattar «Amanat» partııasynyń «Ádilet» partııasyna qosylýy týraly sheshimdi qoldady. Tıisti sheshim II sezdiń qaýlysyna engizildi.